DILI, 16 Maiu 2025 (TATOLI)—Sarani no família sira iha Parókia Letefoho, Munisípiu Ermera, daudaun ne’e preparadu simu Saudozu Padre Domingos Maubere no sei organiza misa ba Maktoban iha Parókia Letefoho.
“Ita-nia sarani sira iha Parókia Letefoho agora preparadu hodi hein Amu Domingos to’o iha-ne’ebá. Hafoin ne’e, Parókia Letefoho sei organiza komunidade husi suku sia (9) mai hatudu sira-nia domin bá Amu,” Pároku Parókia Letefoho, Padre Helio Pereira Fernandes, dehan ba jornalista sira iha Hospital Nacional Guido Valadares (HNGV), Bidau, sesta ne’e.
Nia hateten, oráriu ne’ebé dioseze foti ne’e Igreja Parókia Letefoho asesu ona, tanba Amu Kardeál nia desizaun katak Saudozu Padre Domingos Maubere toba kalan ida iha Ermera no aban sei lori filafali mai iha Dili.
“Arsebispu Metropolitana Dili, Dom Virgílio Kardeál do Carmo da Silva, ho família enkontru hamutuk ona, nune’e kria komunikasaun ne’ebé di’ak ho Igreja Parókia sira kona-ba Padre Domingos Maubere nia misa iha Igreja Katedrál Dili no ikus ba fúnebre,” nia hateten.
Notísia relevante: Sarani sira lakon figura di’ak ida hanesan Padre Domingos Maubere
Padre ne’e haktuir Amu Kardeál ho fuan no atensaun tomak hodi rona família sira-nia preokupasaun no rona família nia hanoin oinsá Padre Domingos Maubere hetan fatin kalan ida hamutuk ho sarani tomak iha Letefoho.
“Amu Kardeál fuan-boot. Rona ho atensaun no hatán ba proposta ida-ne’e, entaun horisehik deside katak Padre Domingos Maubere bele bá hamaluk ho ita-nia sarani sira iha Letefoho kalan ida, no dezloka husi Dili uza Aviaun ne’ebé hetan apoiu husi Timor GAP,” nia informa.
Jornalista: Felicidade Ximenes
Editór: Xisto Freitas da Piedade
