DILI, 16 Maiu 2025 (TATOLI)—Prezidente Repúblika (PR), José Ramos Horta, sente triste ho falesimentu Amu Domingos Maubere, iha sesta (16/5) dadeer tuku 07:20 Otl.
“Ha’u koñese Amu Maubere kle’ur ona. Ha’u hanoin líder sira iha Timor ne’e ha’u mak pasa tempu liu ho nia. Uluk mezmuke sei iha Malázia moras daudaun, haruka WatsApp mai ha’u, krítika ha’u kona-ba edukasaun no ema ki’ak. Ne’e hatudu katak nia maski moras maibé nia preokupa no hadomi povu ki’ik ida-ne’e,” Horta hateten ba jornalista sira hafoin vizita Tribunál Rekursu, Kaikoli, Dili, sesta ne’e.
Tuir Horta, Amu Domingos Maubere, ema ida-ne’ebé di’ak tebetebes, ema simples, ema ida ulun-fatuk to’os, ho sentidu katak difísil muda ninia hanoin.
Notísia relevante: Padre Domingos Maubere hakotu ona iis
Xefe Estadu konsidera partisipasaun luta Amu Maubere nian ne’e hanesan mós ho luta Xanana Gusmão no Lere Anan Timur, menus mak nia (Amu Maubere) la kaer kilat, maibé luta ne’e la’ós kaer kilat de’it.
Horta rekorda katak tinan hirak nia laran bainhira vizita Amu Maubere nia aldeia, Amu mobiliza populasaun hodi simu nia, nune’e ho falesimentu Amu Maubere ne’e lori tristeza boot ida ba povu Timor-Leste liuliu mós ba Prezidente Repúblika.
“Portantu, ha’u triste no triste tebetebes. Segundu, ita lakon ema ida, nia eroi ida no eroi nasionál ida no nia mós hanesan Padre seluk hanesan Padre Mário Belo ne’ebé mós fó nia kontribuisaun ba luta libertasaun nasionál no mós Padre no Madre sira seluk,” nia konklui.
Jornalista: Natalino Costa
Editór: Xisto Freitas da Piedade
