DILI, 16 Maiu 2025 (TATOLI) – Xefe Bankada CNRT, Duarte Nunes, espresa sentimentu triste tanba Igreja no povu Timor-Leste (TL) lakon ona bibi-atan di’ak Padre Domingos da Silva Soares “Maubere”.
“Ha’u-nia kolega eskola no durante ne’e [nia moras] ha’u bá haree. Prontu, situasaun mak ne’e, Maromak mak bolu ona, sentimentu triste, lori bankada no família nia naran ho orasaun nia hetan fatin hakmatek no sentidu kondolénsia ba família ne’ebé hasoru situasaun todan”, Duarte Nunes hato’o hafoin rona novidade triste kona-ba falesimentu Pe. Maubere, ohin, iha tuku 7h20, iha Ospitál Nasionál Guido Valadares (HNGV, iha portugés).
Nia husu ema hotu atu halo orasaun hodi matebian hetan fatin kmanek iha Na’i nia kadunan santu iha lalehan hamutuk ho anju sira.
Deputadu ne’e dehan matebian hanesan amu-lulik ne’ebé kontribui barak ba rai ne’e iha luta ba kauza indepedénsia.
“Amu nia kontribuisaun maka’as [iha tempu luta ba libertasaun]. Nia uza batina bá Makau, Portugál, organiza orientasaun ne’ebé maun Xanana [Komandante Ein-Xefe FALINTIL] orienta nia hala’o iha li’ur no rai-laran”, dehan.
Nia haktuir, matebian iha tempu indepedénsia nu’udar na’i-lulik ne’ebé kontinua kontribui ba dezenvolvimentu país nian.
“Nia la’ós apoia ida-ne’e no ida ne’ebá atu hasoru Governu ne’ebé de’it. Nia apoia hotu-hotu dezde Governu ne’ebé halo serbisu di’ak. Se [ladi’ak] nia Kritika”, deputadu ne’e haktuir.
Xefe Bankada Partidu Demokrátiku, Manuel Henrique Noronha, mós sente lakon figura ida iha relijiaun Katólika Timor-Leste nian, ne’ebé hadomi sarani no povu no hanesan mós rezisténsia ida ne’ebé kontribui maka’as ba luta.
“Amu Domingos Maubere figura ida ne’ebé kontribui maka’s, depois iha era indepedénsia mós nafatin lian la lakon atu fó observasaun tomak ba dezenvolvimentu iha ita-rai rai laran”, dehan.
Nia lori bankada nia naran hato’o kondolénsia kle’an ba família enlutada no akompaña ho orasaun atu maktoban deskansa iha fatin kmanek iha reinu lalehan nian.
Bankada ne’e mós hanoin atu iha reuniaun líder bankada mai sei aprezenta hodi bele Parlamentu aprova votu pezár ba falesimentu Pe. Maubere.
Pe. Domingos Maubere hakotu iis iha HNGV hafoin halo tratamentu intensivu iha Unidade Kuidadu Intensivu (ICU) dezde 08 Maiu 2025.
Saserdote ne’ebé koñesidu nu’udar servidór espirituál ba komunidade katólika no kombatente ba libertasaun, defensór ba direitu umanu no justisa ka luta-na’in ba Timor-Leste nia autodeterminasaun ne’e hakotu iis ho idade 73.
Notísiarelevane: https://tatoli.tl/2025/05/16/padre-domingos-maubere-hakotu-ona-iis/
Jornalista: Nelson de Sousa
Editora: Maria Auxiliadora
