DILI, 16 Maiu 2025 (TATOLI) – Iha fulan ne’e, Timor-Leste lakon figura boot na’in-rua husi Ermera ne’ebé fó ona kontribuisaun estraordinária ba istória luta no dezenvolvimentu nasaun nian, Padre Domingos Soares ‘Maubere’, no Ernesto Fernandes ‘Dudu’.
Ho sira-nia falesimentu ne’e, eis-Prezidente Repúblika, Taur Matan Ruak, hato’o nia sentidu kondolénsia ba Pe. Domingos Maubere no veteranu Ernesto Fernandes ‘Dudu’, liuhusi nia pájina ofisiál katak triste tebes tanba lakon figura boot Timor-Leste na’in-rua husi munisípiu Ermera. Sira na’in-rua nia mate besik malu iha fulan-Maiu, husik hela tristeza kle’an ba nasaun.
“Foin rona tan notísia triste ida katak ita lakon tan ona Amu Domingos Maubere. Pe. Maubere la’ós figura ba uma-kreda de’it maibé figura importante ida mós iha ita-nia jornada luta ba Libertasaun Nasionál”, Taur hateten.
Taur mós hato’o sentidu kondolénsia kle’an ba Padre Maubere nia família alargada, povu Ermera, no komunidade Igreja Katólika Timor-Leste.
“Triste tebes tanba Timor-Leste lakon nia figura importante rua tuituir malu, ita-nia Aman Ernesto Dudu no Amu Maubere. Ita hotu nia orasaun akompaña atu Na’i simu iha Nia Kadunan Santu”, hato’o.
Iha sorin seluk, Prezidente Autoridade Munisípiu Ermera, José Martinho Soares, dehan ba Tatoli via telefone katak Pe. Maubere kontribui maka’as ba luta Timor-Leste nia indepedénsia.
Bainhira nia rona amu Domingos Maubere nia mate ne’e novidades triste, tanba amu nia kontribuisaun ba luta ida-ne’e hahú kedas nia sai amu-lulik iha 1977 no iha 1978 bainhira nia fila husi Portugál mai Timor-Leste dedika an kedas ba luta ne’e.
Nia esplika katak Pe. Domingos mós kontribui ba harii Konsellu Nasionál Rezisténsia Timorense (CNRT) no ikus mai timoroan vota ba ukun-rasik an.
“Sentidu kondolénsia ne’e ami povu Ermera tomak, ami lakon ami-nia ema rua, komandante rejiaun IV Ernesto Dudu no Amu Domingos Maubere iha fulan ne’e hotu. Ami sente triste loos”, dehan.
Lakon figura nain-rua husi Ermera ne’e kuaze iha tempu ne’ebé hanesan sai hanesan xoke ida ba partidu barak, iha igreja nia laran, sosiedade sivíl, no mundu polítiku Timor-Leste nian.
Ho espíritu devosaun no luta ne’ebé sira husik hela, povu timoroan hanoin hikas sira na’in-rua nu’udar ai-riin morál no patriota iha istória nasionál.
Padre Domingos Soares Maubere hakotu iis iha sesta dadeer, 16 Maiu 2025, pur volta 07h05, iha Ospitál Nasionál Guido Valadares (HNGV), hafoin hetan tratamentu intensivu dezde loron 8 Maiu iha Kuidadu Intensivu (ICU).
Moris iha Munisípiu Ermera iha loron 12 fulan-Maiu tinan 1952, Padre Domingos koñesidu nu’udar figura espirituál ne’ebé metin iha nia fiar no iha istória naruk iha luta ba ukun rasik-an, inklui nia envolvimentu iha rede rezisténsia durante okupasaun Indonézia.
Nia hala’o knaar nu’udar Pároku Bekora nian no iha loron 19 fulan-Maiu 2023 hetan kondekorasaun Orden Timor-Leste nian husi Prezidente José Ramos-Horta tanba nia kontribuisaun ba nasaun.
Antes ne’e, iha loron 7 fulan-Maiu tinan 2025, Ernesto Fernandes, ne’ebé koñesidu liu ho naran Dudu, mate ho tinan 80 iha ospitál hanesan tanba sofre AVC hemorrájiku. Nia hetan tratamentu dezde 10 Abríl 2025.
Dudu moris iha 18 Juñu 1945 iha postu administrativu Hatulia, Ermera, no koñesidu nu’udar Komandante Rejiaun IV FALINTIL iha tempu okupasaun Indonézia. Nia mós hala’o knaar nu’udar membru Parlamentu Nasionál ba Partidu Demokrátiku (2018–2023), no iha fulan-Novembru 2021 hetan kondekorasaun Orden Timor-Leste nian husi eis-Prezidente Francisco Guterres ‘Lú Olo’.
Jornalista: Arminda Fonseca
Editora: Maria Auxiliadora
