KOVALIMA, 17 Maiu (2025)—Enkontru Konsultasaun Sub Rejionál Nasaun Sudeste Aziátiku Reprezentante Organizasaun Nasaun Sudeste Aziátiku, iha Munisípiu Kovalima, sábadu ne’e, diskute asuntu rai.
Sekretáriu Munisipál Administrasaun no Finansa Autoridade Munisipál Kovalima, Alberto Moniz de Araújo, ne’ebé partisipa iha reuniaun ne’e esplika katak reuniaun referida ho objetivu partilla esperiénsia kona-ba defende komunidade oinsá luta ba sira-nia direitu ba rai no kultura.
“Ita hasoru-malu ho reprezentante Organizasaun Nasaun Sudeste Aziátiku (ASEAN-sigla inglés) hodi ko’alia kona-ba riku-soin liuliu direitu rai ne’ebé beiala sira husik iha Timor. Enkontru ida-ne’e intersante loos tanba bele troka ideia ba malu liga ho ema rai-na’in no mós ita-nia kultura hanesan sira-ne’ebé hela iha fronteira,” Alberto dehan ba jornaista sira, iha salaun Sentru Juventude Kovalima.
Iha biban ne’e, Reprezentante Organizasaun Nasaun Sudeste Aziátiku, Beverly Longid, dehan enkontru ne’e foin dahuluk ne’ebé diskute isu kona-ba rai no isu sira seluk tan.
“Isu kona-ba rai importante atu ita halo diskusaun tanba laiha rai ita labele hala’o moris. Bainhira atu halo mega projetu sira, rai sempre iha problema, tan ne’e oinsá ita serbisu hamutuk atu halo dezenvovimentu iha ita-nia nasaun sein iha disputa ba rai,” nia dehan.
Enkontru Konsultasaun Sub Rejionál Nasaun Sudeste Aziátiku ne’ebé organiza husi Sentru Juventude Kovalima (CJC-sigla portugés) ne’e, servisu hamutuk ho Asia Indegenous Peoples Pact (AIPP), iha-ne’ebé partisipa husi matenek-na’in sira husi Malázia, Filipina, Indonézia, Thailándia no Timor-Leste.
Jornalista: Celestina Teles
Editór: Xisto Freitas da Piedade
