DILI, 17 Maiu 2025 (TATOLI) –Timor-Leste restaura nia independénsia hahú loron 20 fulan-Maiu 2002. Tinan ne’e, povu no nasaun komemora loron importante no istóriku ne’e ba da-23 ho tema “Hametin pás no dezenvolvimentu”.
Nune’e, iha ámbitu komemorasaun loron ida-ne’e, Jornalista TATOLI entrevista komunidade – joven no adultu sira, hodi buka hatene oinsá importánsia loron restaurasaun ne’e no oinsá sira-nia hanoin no reflesaun ba loron ne’e rasik. Tuirmai komunidade sira-nia hanoin:
Joven bairru Matadoru, Emelita Lopes Rodrigues:
Loron 20 Maiu hanesan loron ne’ebé husu ba ita hotu atu hanoin hikas fali ita-nia istória independénsia ka ukun rasik aan. Loron ida-ne’e importante tebes ka la’ós hanesan loron baibain no husi ita-nia ukun aan ne’e iha mudansa uitoan-uitoan kada tinan.
Maske iha buat balun ne’ebé seidauk iha mudansa ba dezenvolvimentu hanesan infraestrutura no seluktan, nune’e ha’u husu ba Governu presiza kria dezenvolvimentu ne’ebé adekuadu liuliu loke kampu traballu ba joven sira hodi hamenus konflitu.
Komunidade Bebora, Agostinho Gonçalves:
Loron ida-ne’e importante hodi hafanun fali ita timoroan liuliu joven sira mantein loron independénsia no hanoin hikas fali istória pasadu ne’e oinsá. Ita tenke hanoin hikas fali no tenke iha sentidu nasionalizmu hodi komemora loron ne ho di’ak, tanba lafasil ba rai ida atu ukun rasik aan; presiza terus no tempu-naruk nia laran.
Durante tinan-23 ne’e maioria ita haree iha balun di’ak no balun seidauk di’ak liuliu iha área rurais sira. Tanba ne’e ha’u nafatin husu ba Governu atu esforsu hodi halo dezenvolvimentu to’o área urbana inklui remota sira-ne’e, no mós hanesan povu ita mós tenke hamutuk ho Governu hodi kontribui dezenvolvimentu ne’ebé di’ak liután ba futuru mai.
Komunidade suku Fatuhada, Arlindo dos Santos:
Bainhira atu festeza loron restaurasaun independénsia ne’e sente triste no kontente tanba ita agradese bele ukun rasik aan husi problema torturasaun nia laran. Maibé, bainhira ita ukun aan ona mós povu balun nafatin halerik ba dezenvolvimentu no nesesidade.
Ne’e lasignifika Governu nia servisu ladi’ak maibé servisu laiha planu hanesan sobu ida husik ida ba fali ona iha fatin seluk, no servisu ne’e mós kle’ur ka lenuk liu. Nune’e hanesan povu baibain liuhusi loron importante ida-ne’e nafatin sai hanesan istória ida mai ita no presiza kria dezenvolvimentu ne’ebé di’ak liután.
Aleinde ne’e, ami mós sempre hasa’e bandeira iha uma hodi hanoin hikas tempu pasadu ami mak sai istória pasadu nian no joven mak sai jerasaun nune’e tenke prezerva didi’ak loron ida-ne’e.
Jornalista: Alexandra da Costa
Editór:Rafael Ximenes de A.Belo
