DILI, 16 Maiu 2025 (TATOLI)—Prezidente Repúblika, José Ramos Horta, husu ba Prezidente Tribunál Rekursu, Afonso Carmona, atu fó prioridade ba estabelesimentu Supremu Tribunál Justisa (STJ).
Xefe Estadu esplika, tuir Konstituisaun, iha tinan 20 nia laran, Timor-Leste (TL) tenke iha ona Supremu Tribunál Justisa ida, maibé realidade liu tiha ona tinan 20 seidauk estabelese STJ.
“Ha’u mai iha-ne’e hatudu de’it solidariedade, simpatia sistema judisiáriu ba Prezidente Tribunál Rekursu foun. Agradese mós ba nia kolega Juíz Konsileiru sira hotu-hotu kontinua servisu nu’udár Juíz Konsileiru iha Tribunál Rekursu no tranzmite mós ba sira, nu’udár Prezidente, ha’u-nia kbiit atu haree aselera instalasaun Tribunál Supremu Timor-Leste nian,” Horta hateten ba jornalista sira hafoin hala’o vizita servisu ba edifísiu Trubunál Rekursu, Kaikoli, sesta ne’e.
Xefe Estadu ne’e kompromete katak molok nia mandatu ramata nia hakarak iha ona Supremu Tribunál Justisa Timor-Leste, más ne’e sei liuhusi kalendáriu aprovasaun husi ema lubuk ida, Parlamentu no Konsellu Superiór Majistratura Judisiária no juíz sira.
Horta hateten rekursu ba estabelesimentu Supremu Tribunál Justisa ne’e iha tanba iha juíz lubuk ida iha esperiénsia, dezde sira hetan apoiu morál, apoiu polítiku, apoiu tékniku, se presiza ema maihusi li’ur hanesan Portugál, Cabo-Verde, Brazíl, hodi fó apoiu asesoria jurídika.
Iha fatin hanesan, Prezidente Tribunál Rekursu, Afonso Carmona, agradese ba Xefe Estadu José Ramos Horta nia prezensa iha Tribunál Rekursu tanba atu haforsa polítika ba estabelesimentu Supremu Tribunál Justisa ne’ebé antes ne’e sai ona ne’ebé Prezidente Trubunál Rekursu temi ona iha deskursu bainhira toma pose.
Carmona kompromete katak durante nia mandatu hanesan Prezidente Tribunál Rekursu sei fó prioridade hodi instala Supremu Tribunál Justisa.
“Ita iha kalendáriu. Tanba ne’e mak sei koordena ho Ministru Justisa, tanba nia mak nu’udár koordenadór ba asuntu justisa nian. Entaun, prosesu ne’e la’o hela. Ha’u konsidera ida-ne’e prioridade, tanba ne’e ha’u sei la husik buat ne’e. Tenke lori to’o mandatu ne’ebé fó mai ha’u,” nia afirma.
Nia dehan sei redezeña dezeñu edifisiu Supremu Tribunál Rekursu no tinan 2026 instalasaun Supremu Tribunál Justisa hahú la’o ona.
Jornalista: Natalino Costa
Editór: Xisto Freitas da Piedade
