Kardeál: Ema hotu tenke iha vontade di’ak hodi dezenvolve Timor-Leste
DILI, 18 Maiu 2025 (TATOLI) – Arsebispu Metropolitana Dioseze Dili, Don Virgílio Kardeál do Carmo da Silva, afirma iha ámbitu selebrasaun Aniversáriu Restaurasaun Independénsia ba dala 23 ho tema “Hametin Paz no Dezenvolvimentu”, apezarde Timor-Leste sei enfrenta dezafiu no problema oioin, ema hothotu tenke iha vontade di’ak hodi dezenvolve rai ida ne’e.
“Tema ne’e fó laran metin ba ita-nia ukun na’in sira, maske iha dezafiu no problema oioin, ema hotu-hotu tenke iha vontade di’ak atu dezenvolve ita-nia rai ida ne’e”, Dom Virgílio Kardeál do Carmo da Silva hetete ba TATOLI, iha Katedrál, Vila Verde, Dili.
Tuir Arsebispu, tema selebrasaun Loron Restaurasaun Independénsia reflete mós ho Tinan Jubileu 2025 ho nia tema “Peregrinus Esperansa” ne’ebé inspiradu husi Papa Francisco.
Don Virgílio akresenta katak esperansa labele sai liafuan mamuk de’it, maibé ejije ema hotu nia vontade di’ak atu lori dezenvolvimentu ba Timor-Leste.
Kardeál fó nia gratidaun ba tema ne’ebé aprova husi Governu, tanba tema ida ne’e lao tuir kedas uma kreda ni’an hodi bele fó esperansa no laran metin nafatin ba povu timoroan tomak.
“Ha’u hakarak dezeju loron ksolok ba ema hotu iha Loron Restaurasaun ba Independência, iha 20 Maiu. Parabéns ba povu Timor-Leste”, konklui.
Jornalista: Jesuína Xavier
Editora Isaura Lemos de Deus
