DILI, 18 Maiu 2025 (TATOLI)—Sekretaria Estadu Kooperativa (SEKoop) lideradu husi Sekretariu Estadu Arsénio Pereira da Silva, hamutuk ho delegasaun, inklui Movimentu Kooperativa Primária rua partisipa iha 𝘼𝙎𝙀𝘼𝙉 𝘾𝙤𝙤𝙥𝙚𝙧𝙖𝙩𝙞𝙫𝙚 𝘿𝙞𝙖𝙡𝙤𝙜𝙪𝙚 (𝘼𝘾𝘿-2025) ne’ebé organiza husi 𝘼𝙎𝙀𝘼𝙉 𝘾𝙤𝙤𝙥𝙚𝙧𝙖𝙩𝙞𝙫𝙚 𝙊𝙧𝙜𝙖𝙣𝙞𝙯𝙖𝙩𝙞𝙤𝙣 (𝘼𝘾𝙊) durante loron tolu, hahú husi loron 12 to’o 14 Maiu 2025, iha Selangor, Malázia.
Bazeia ba ajenda loron dahuluk nian, Sekretáriu Estadu Kooperativa sei partisipa seremónia abertura asembleia jerál anuál ASEAN kooperativa organizasaun nian (ACO-AGM), loron daruak partisipa iha 𝘼𝙎𝙀𝘼𝙉 𝘾𝙤𝙤𝙥𝙚𝙧𝙖𝙩𝙞𝙫𝙚 𝙁𝙤𝙧𝙪𝙢 2025 (𝘼𝘾𝙁2025) no vizita ba pavillaun Timor nian ne’ebé mak movimentu kooperativa sira halo hela promosaun 𝙋𝙧𝙤𝙙𝙪𝙘𝙩 𝙎𝙝𝙤𝙬𝙘𝙖𝙨𝙚 ba produtu sira hanesan tais, baniben, Bafo Kayrala no kafé timor no iha loron datoluk partisipa iha 𝘼𝙎𝙀𝘼𝙉 𝘾𝙤-𝙤𝙥𝙚𝙧𝙖𝙩𝙞𝙫𝙚 𝙃𝙞𝙜𝙝-𝙇𝙚𝙫𝙚𝙡 𝘿𝙞𝙖𝙡𝙤𝙜𝙪𝙚 2025 (𝘼𝘾𝙃𝙇𝘿2025).
Sekretáriu Estadu Kooperativa, Arsénio Pereira da Silva, objetivu husi partisipasaun ne’e atu partilla koñesimentu ho nasaun membru ASEAN sira iha área kooperativa no lori mós Movimentu Kooperativa Primária sira hodi halo 𝙨𝙝𝙤𝙬𝙘𝙖𝙨𝙚 ba produtu Timor nian.
“Ha’u lidera delegasaun ida husi SEKoop, inklui mós Movimentu Kooperativa Primária rua hanesan CU Builale husi Vikeke no CU Feto Potensiál husi Dili, mai partisipa iha eventu 𝘼𝙎𝙀𝘼𝙉 𝘾𝙤𝙤𝙥𝙚𝙧𝙖𝙩𝙞𝙫𝙚 𝘿𝙞𝙖𝙡𝙤𝙜𝙪𝙚 iha Malázia,” Sekretáriu Estadu informa iha nia kna’ar fatin, foin lalais ne’e.
“𝘼𝙎𝙀𝘼𝙉 𝘾𝙤𝙤𝙥𝙚𝙧𝙖𝙩𝙞𝙫𝙚 𝘿𝙞𝙖𝙡𝙤𝙜𝙪𝙚 ida-ne’e importante tebes tanba aleinde partisipa iha Asembelia Jerál Anuál ACO nian no lori reprezentante movimentu kooperativa primária hodi partisipa iha 𝘾𝙤𝙤𝙥𝙚𝙧𝙖𝙩𝙞𝙫𝙚 𝙋𝙧𝙤𝙙𝙪𝙘𝙩 𝙎𝙝𝙤𝙬𝙘𝙖𝙨𝙚,” governante ne’e subliña.
Dirijente ne’e hatutan, aleinde ne’e partisipa mós iha forum no diálogu ne’ebé ko’alia barak kona-ba papél estratéjiku hosi movimentu kooperativa ASEAN nian hanesan kanalizadór ba transformasaun ekonómika rejionál ba dezenvolvimentu ida-ne’ebé justu liu, inkluzivu no sustentavél.
“Fórum ne’e halibur líder kooperativa sira, akadémiku sira, peritu sira indústria nian, no polítiku sira hosi rejiaun tomak hodi diskute kona-ba potensiál no futuru kooperativa sira nian iha ASEAN,” Arsénio haktuir.
Agora daudaun, tuir nia, papél kooperativa kontribui de’it 2% ba ASEAN nia produtu internu brutu (PIB/GDP) no ACO hakarak bolu atensaun ba membru ASEAN hotu atu importánsia ba kooperativa hodi hasa’e ba 10% iha 2030.
Iha márjen atividade 𝘼𝙎𝙀𝘼𝙉 𝘾𝙤𝙤𝙥𝙚𝙧𝙖𝙩𝙞𝙫𝙚 𝘿𝙞𝙖𝙡𝙤𝙜𝙪𝙚 (𝘼𝘾𝘿2025), Arsénio hatutan, SEKoop mós hala’o enkontru bilaterál ho nia omólogu, Ministru Dezenvolvimentu Emprezariál no Kooperativa Malázia nian, Ewon Benedick, hodi diskute asuntu posibilidade kooperasaun iha futuru.
“Malázia hanesan nasaun ne’ebé ekonomikamente avansandu, sira-nia kooperativa kontribui 2% ba sira nia PIB/GDP, tan ne’e ita fiar katak ho kooperasaun ho sira iha área sira hanesan treinamentu, formasaun no 𝙚𝙭𝙘𝙝𝙖𝙣𝙜𝙚 𝙠𝙣𝙤𝙬𝙡𝙚𝙙𝙜𝙚 𝙖𝙣𝙙 𝙗𝙚𝙨𝙩 𝙥𝙧𝙖𝙘𝙩𝙞𝙘𝙚𝙨,” nia hateten.
Nia salienta, bele dezenvolve liután ita movimentu kooperativa sira hodi bele fó kontribuisaun signifikante ba kreximentu ekonómiku.
“Tékniku sira sei servisu hodi identifika área importante sira no Timor-Leste no Malázia sei halo kooperasaun entre Governu ho Governu no movimentu kooperativa ho movimentu kooperativa iha área kooperativa,” nia esklarese.
Nia énfaze, “Iha biban ida-ne’e mós ha’u konvida verbalmente Ministru Benedick atu bele partisipa iha eventu 𝙏𝙝𝙚 𝘼𝙎𝙀𝘼𝙉 𝙄𝙣𝙩𝙚𝙧𝙜𝙤𝙫𝙚𝙧𝙣𝙢𝙚𝙣𝙩𝙖𝙡 𝘾𝙤𝙤𝙥𝙚𝙧𝙖𝙩𝙞𝙫𝙚 𝙁𝙤𝙧𝙪𝙢 (𝘼𝙄𝘾𝙁) ne’ebé tuir planu sei hala’o iha Dili iha tinan 2026”.
Aleinde ne’e mós Prezidente Kooperativa CU Builale, Jacinta Ximenes no Feto Potensiál espresa sira nia sentimentu kontente ba oportunidade ne’ebé mak sira hetan hodi partisipa iha 𝑪𝒐𝒐𝒑𝒆𝒓𝒂𝒕𝒊𝒗𝒆 𝑷𝒓𝒐𝒅𝒖𝒄𝒕 𝑺𝒉𝒐𝒘𝒄𝒂𝒔𝒆 iha Malázia.
“Tanba Governu iha inisiativa atu motiva kooperativa sira no envolve ami iha atividade sira hanesan ne’e, enkuantu durante iha atividade ne’e ami hetan vizitante sira husi nasaun seluk lubuk ida-ne’ebé iha interese atu vizita Timor-Leste hodi haree produtu movimentu Kooperativa sira-nian no produtu sira seluk,” prezidente CUB ne’e hateten.
Nia hatutan, “Ami sente kontente tebes, bele hetan oportunidade ida-ne’e husi IX Governu liuliu SEKoop. Espera bele envolve nafatin movimentu kooperativa sira iha eventu hotu no kontinua motiva ami atu pró-ativu liu-tán”.
Timor-Leste hanesan membru asosiadu ba ACO hola parte iha atividade ida-ne’e hatudu Timor nia kompromisu hodi envolve iha atividade sira iha ASEAN nian nu’udár parte ida kontribui ba Timor nia esforsu hodi adere ba ASEAN liuliu oinsá mak Timor-Leste ekonomikamente bele entende no integra iha ASEAN.
Entretantu, kooperativa sira-ne’ebé partisipa iha eventu ne’e mai husi nasaun ASEAN hanesan Tailándia, Indonézia, Filipina, Brunei, Timor-Leste, Vietname no mós reprezentante sira husi kooperativa sira iha Malázia tomak.
Jornalista: Alexandra da Costa
Editór: Xisto Freitas da Piedade
