Estudante UNPAZ ida mout iha mota Iarabere-Vikeke
VIKEKE, 19 Maiu 2025 (TATOLI)—Intensaun atu kasu kolen hodi passa-tempu haris iha mota Irabere maibé bainhira haksoit tama ba bee-mota ne’e nia laran, kolen hirak ne’e bee-mota Irabere korut-mohu to’o iis kotu.
Ida-ne’e mak akontese ba vítima estudante Universidade da Paz (UNPAZ), Ronaldo Mendes Rubik, idade 22, Fakuldade Direitu, husi suku Irabin de Cima, postu administrativu Uatukarbau, munisípiu Vikeke, bee-mota Irabere tolan nia mout no mate iha bee laran.
Xefe suku Irabin de Baixo, José Baptista do Carmo, hateten vítima Ronaldo Mendes Rubik ho ninia kolega estájiáriu sira husi Universidade da Paz (UNPAZ) bá haris iha mota Irabere mak mout iha bee laran, lori sai vítima husi bee laran mai ne’e iis laiha tiha ona.
“Akontesmentu ne’e foin lalais sesta (17 Maiu 2025) vítima ne’e husi ami-nia suku Irabin de Baixo, vítima ho nia kolega sira lori malu ba haris iha mota Irabere, depois sira to’o ne’ebá sira hahú haris. Iha haris ne’e vítima sa’e ba fatuk leten mak haksoit tun ba bee-laran ba dala tolu, vítima la sai ona iha bele leten, nia kolega sira hein la sai, sira informa ba parte aurtoridade sira PNTL sira bá fatin akontesementu mak orienta família sira tama ba bee laran buka, konsege hetan maibé ho kondisaun mate,” José Baptista do Carmo hateten ba Agência TATOLI, iha postu Vikeke Vila, ohin.
Autoridade ne’e hatutan, hafoin hetan tiha vítima família sira kontinua lori vítima ba ninia rezidénsia iha aldeia Lacoloro Hoo, suku Irabin de Baixo hodi halo prosesu funerál
“Tuir planu família katak ita-nia vítima Ronaldo horsida lorokraik hanesan ne’e família sira hahú halo prosesu fenerál, iha suku Irabin de Baixo,” nia dehan.
Iha fatin seluk, Komandante Polísia Nasionál Timor Leste (PNTL) eskudra postu Uatukarbau, Inspetór Jacob Amatal haktuir, akontetesementu joven Ronaldo Mendes Rubik mout iha mota Irabere, suku Irabin de Cima ne’e PNTL hamutuk ho pesoál saúde dezloka kedas ba fatin akontesementu hodi halo observasaun.
“Iha akontesene ne’e, ami PNTL hamutuk ho pesoál saúde husi postu Uatukarbau dezloka kedas ba fatin akontesementu mota Irabere hodi observa direta vítima ne’ebé sei mout iha bela laran. Nune’e, família mane sira ajuda luku ba bee laran mak hetan vítima iha bee laran, maibé mate ona tanba kuaze oras ida mout iha bee laran,” nia hateten.
Tuir kronólojia, vítima Ronaldo Mendes Rubi, iha loron 17 Maiu 2025 tuku 09h00 dadeer, vitima ho nian kolega na’in-ualu (8) sai husi Vikeke mai Uatukarbau. Maizumenus tuku 10h30 sira to’o iha vítima nian uma Uatucarbau. Vítima ho ninia kolega sira deskansa uitoan iha vitima uma no vítima nia inan prepara bee-manas sira hemu tiha mak aranka ba bee mota Irabere.
Iha Momentu ne’e vítima dehan ba nia inan katak ‘ha’u (Ronaldo) ho kolega sira fila mai mak han no fila ba Vikeke’. Ho nune’e, iha tempu ne’e vítima nia alin na’in-rua mós la’o ho sira hamutuk na’in-11 ba mota Irabera, maizumenus 15h00 sira iha ona bee-matan Irabere no sira komesa haris.
Tuir informasaun ne’ebe PNTL eskudra Uatukarbau rekolla husi vítima nia kolega no vítima nia alin sira dehan ‘sira haris hotu, so nia (Ronaldo) mak ba sa’e fatuk leten hodi haksoit dala-rua ba bee laran, maibé la iha buat ida, depois vítima sa’e fali tán, atu haksoit tán ba dala tolu, entaun nia bee mout ona iha bee laran’.
Iha akontese ne’e, iha tuku 16h00 lorokraik vítima kuaze mout iha bee laran, hafoin PNTL ho ekipa sira to’o tiha fatin mak husu ajuda ba família sira ne’ebé hatene luku bee, mak tama ba bee laran konsege hetan vítima nune’e sira hasai vítima iha bee laran maibé vítima mate tiha ona.
Nune’e, família sira konsidera vítima ninian destinu mak ne’e ona no husi nia kolega no Autoridade UNPAZ mai hamutuk hodi halo serimónia funeral.
Vitima Naran Ronaldo Mendes Rubik, moris iha loron 17 Novembru 2003, aman Cristovão Mendes no inan Rosina Soares husi aldeia aldeia Lacoloro Hoo, suku Irabin de Baixo, postu Uatukarbau.
Jornalista : Vitorino Lopes da Costa
Editór : Cancio Ximenes
