PR Horta husu halo reforma radikál ba funsaun públika
DILI, 19 Maiu 2025 (TATOLI) – Prezidente Repúblika (PR), José Ramos Horta, hatete, presiza halo reforma radikál ba funsaun públika tanba númeru funsionáriu iha Timor-Leste barak liu kompara ho nasaun Ázia no mundu.
“Ita haree dezastre boot iha funsaun públika, ha’u ko’alia ho Prezidente Komisaun Funsaun Públika (KFP) bainhira ami hasoru malu, ha’u rona númeru funsaun públika ne’e ha’u hakfodak”, Prezidente Ramos Horta, liuhusi nia diskursu abertura teste bolsa kandidatu iha salaun KFP Matadouru, Segunda ne’e.
Nia dehan, iha mundu laiha rai ida ho populasaun ho númeru funsionáriu aas liu iha mundu no iha Ázia.
“Timor detalladu númeru 1 iha mundu tanba númeru funsionáriu aas liu ho populasaun ne’ebé ki’ik, ida-ne’e tenke iha reforma radikál. Tuir dadus husi Komisaun Funsaun Públika iha tinan 2024, númeru funsionariu públiku permanente no ajente administrasaun públika ne’ebé mak iha lista forsa traballu KFP nian besik rihun haat nulu,” nia dehan.
Prezidente KFP, Agostinho Letencio de Deus, dehan, situasaun forsa traballu iha kontestu funsaun públika ba tinan 2023 nian, tuir dadus atualizasaun iha baze SIGAP KFP rejista funsionáriu permanente inklui ajente administrasaun públika ativu ho totál 39.380, neʼebé kompostu husi feto 14.115 no mane 25.265. Husi númeru ne’e funsionáriu permanente 33.004, ajente administrasaun públika 6376.
Totál funsionáriu Estadu iha na’in 63.000, funsionáriu permanente inklui ajente administrasaun públika, ne’e dadus tinan 2024.
Jornalista : Osória Marques
Editór: Evaristo Soares Martins
