Ramos Horta: Governu ida lakonsege halo kontinuidade iha setór Edukasaun
DILI, 19 Maiu 2025 (TATOLI) – Prezidende Repúblika (PR), José Ramos Horta, observa katak dezde Timor-Leste restaura independénsia iha 20 Maiu 2002, laiha Governu ida halo kontinuidade iha setór Edukasaun.
“Ita haree iha Timor-Leste setór edukasaun tinan lubuk nia laran ne’e, laiha Governu ida konsege halo kontinuidade, ne’ebé halo polítika idak-di’ak ne’e halo kontinuidade, dezde independénsia to’o agora,” Xefe Estadu hatete, iha ámbitu abertura teste bolsa kandidatu ba vaga sekundáriu, iha Komisaun Funsaun Públika, Matadouru, segunda ne’e.
Xefe Estadu hatutan, laiha setór ida iha Timor-Leste ka iha rai ne’ebé iha mundu importante setór edukasaun. Edukasaun ne’ebé hatuur husi pre-eskolár to’o universitáriu, tékniku, laiha povu ida, nasaun ida bele haksoit ba oin, laiha edukasaun ne’ebé di’ak.
Eis Ministru Negósiu Estranjeiru no Kooperasaun ne’e hateten, setór edukasaun laiha kontinuidade tanba mós kontribui hosi polítika partidaria mós.
“Tanba sistema polítika partidáriu, tanba ita-nia demokrasia laiha kontinuidade, maske planu estratéjiku dezenvolvimentu nasionál, maibé laiha estabilidade, laiha kontinuidade intermu governasaun,” Xefe Estadu preokupa.
“Parabéns ba Ministra Edukasaun ne’ebé ho korrajen hahú prosesu modernizasaun reforma iha setór edukasaun. Ministra Edukasaun kontinua, sé mak hakarak halo manifestasaun nafatin, ba interese nasionál, futuru rai ida-ne’e tenke reforma nia radikál,” nia hateten.
Xefe Estadu akresenta, lisensiatura ne’e kualidade saida, no vale saida, diploma ne’ebé simu ne’e vale de’it konforme buat ne’ebé iha ita-boot sira-nia kakutak, tenke aprende duni.
“Tinan balun liu ba ha’u rona, iha Ministériu Finansa, sira halo teste ida iha ne’eba 7% de’it mak hatene, matenek. Entaun Ministra Edukasaun ho korrajen, ho forsa lalika ta’uk, ha’u rona sira-ne’ebé protesta ne’e, sira hatete ami prontu tuir teste ne’e sira-nia deklarasaun, ha’u sei iha relatóriu, signifika sira iha kompeténsia ba tuir teste,” nia katak.
Prezidente Repúblika José Ramos Horta, observa Ministra Edukasaun halo servisu di’ak, iha ministériu ida tenke ministra ida lidera iha kapasidade no tenke iha ekipa ne’ebé kualidade.
“Kolaborasaun ho Ministériu Arte no Kultura, tanba kultura parte importante tebetebes, edukasaun ho kultura labele haketak. Desportu halo parte edukasaun tenke haree didi’ak, programa desportu iha rai laran. Ne’eduni, Ministra Edukasaun kontinua ho korrajen, forsa, lalika tauk,” Xefe Estadu fó hanoin.
Jornalista : Osória Marques
Editór: Evaristo Soares Martins
