DILI, 20 Maiu 2025 (TATOLI)—Prezidente Repúblika, José Ramos Horta, hala’o enkontru kortezia ho Komandante Resort Militár (Danrem) 161 Wira Sakti Kupang, Brigadeiru Jenerál (Brigjen) Tentara Nasional Indonsia (TNI), João Xavier Barreto Nunes, hodi diskute garante seguransa iha liña fronteira Timor-Leste no Kupang.
“Nia (Brigadeiru Jenerál João Xavier) konvidadu, ami hasoru-malu. Ami hanesan família. Nia mai vizita kortezia, ko’alia relasaun Timor-Indonézia, liuliu Timor-NTT,” Prezidente Repúblika, José Ramos Horta, hateten iha Palásiu Prezidente, Bairru-Pité, tersa ne’e.
Iha fatin hanesan, Komandante Resort Militár (Danrem) 161 Wira Sakti Kupang, Brigadeiru Jenerál João Xavier Barreto Nunes, hateten Komemorasaun Loron Restaurasaun Independénsia RDTL ba dala XXIII ne’e hanesan ema karik komesa maduru atu dezenvolve aan.
“Atu dezenvolve Timor-Leste ne’e ita rasik. Ha’u agora Danrem iha Kupang, maski ha’u halai sees husi Timor maibé agora ha’u iha Kupang,” nia afirma.
Nia dehan, kona-ba seguransa fronteira ka jestaun seguransa fronteira, Prezidente Repúblika, José Ramos Horta no hanesan Primeiru-Ministru Xanana énfaze katak seguransa fronteira tenke iha amizade.
“Ita iha amizade. Iha fronteira ita laiha problema. Naktuka la’o loos hela, laiha problema. Ita foin liu funu naruk hahú 1975-1999, ita hakarak hadame situasaun ne’e, kria pás ne’e mak ita hakarak,” nia konklui.
Jornalista: Natalino Costa
Editór: Xisto Freitas da Piedade
