DILI, 20 Maiu 2025 (TATOLI)—Prezidente Repúblika, José Ramos Horta, parbeniza Governasaun Xanana Gusmão ne’ebé susesu oraniza forum kona-ba direitu tasi nian ho susesu, bainhira hato’o diskursu iha aniversariu loron nasionál restaurasaun independénsia 20 Maiu ba da-23 ne’ebé realiza iha Palásiu Prezidensiál Nicolau Lobato, Bairru Pite, Dili.
“Ha’u aproveita mós momentu solene ida-ne’e atu fó parabéns ba ita-nia Governu no,liuliu Primeiru-Ministru Kay Rala Xanana Gusmão ba realizasaun ho susesu Fórum kona-ba Direitu Tasi nian no Rezolusaun ba Disputa sira kona-ba Fronteira Marítima, ne’ebé halibur figura importante na’in-100 ne’ebé matenek iha Direitu Internasionál no Direitu Tasi nian,” Horta hateten liuhusi nia giskursu, tersa ne’e.
Nia dehan, Governu realiza mós iha Timor-Leste Dili Diálog Fórum Internasionál 2025 kona-ba Liberdade Imprensa no Intelijénsia Artifisiál ne’ebé organiza husi Konsellu Imprensa (CI, sigla portugés) Timor-Leste.
Nia hatutan, hodi hatán ho korajen no vizaun ba dezafiu sira-ne’ebé hamosu husi Intelijénsia Artifisiál, mídia sosiál no demokrasia dijitál, Timor-Leste reafirma ona ninia kompromisu ba sosiedade ida-ne’ebé livre, nakloke no iha prova ba futuru.
“Fórum ida-ne’e destaka nu’udar espasu vital ida ba reflesaun no partilla, iha ne’ebé lian nasionál no internasionál sira halibur hamutuk iha objetivu komún ida: atu garante katak teknolojia serbí umanidade, katak liberdade espresaun hetan protesaun no katak demokrasia kontinua kuda ho responsabilidade no transparénsia. Aban, ita mós sente onra atu sai uma-na’in ba Semináriu Rejionál kona-ba Deskolonizasaun, ne’ebé ko-organiza husi Governu Timor-Leste no Komité Espesiál Nasaun Unida nian kona-ba Deskolonizasaun (C24),” Horta dehan.
Enkontru importante ne’e, hala’o ba dala uluk iha Díli, hetan partisipasaun husi diplomata liu 100 ne’ebé akreditadu iha Sede Nasaun Unida nian iha Nova Iorke nune’e mós reprezentante diplomátiku sira husi nasaun sira iha rejiaun Pasífiku, ne’ebé fó onra ba ita ho sira-nia prezensa.
Sira-nia vinda mai Timor-Leste nu’udár razaun ksolok no onra nian, hodi hatudu ita-nia kompromisu konstitusionál ba prinsípiu sira autodeterminasaun no deskolonizasaun nian ne’ebé seidauk hotu iha territóriu barak.
“Eventu hirak ne’ebé mensiona ona akontese iha momentu ida-ne’ebé partikularmente simbóliku, bainhira ita selebra aniversáriu ba da-23 Restaurasaun ita-nia Independénsia nian,” nia afirma.
Prezensa husi distintu konvidadu sira-ne’e reforsa rekoñesementu husi Timor-Leste nia trajetória no nia lian ativu iha Nasaun Unida nia laran, liuliu kona-ba promosaun husi direitu husi povu sira-ne’ebé sei iha administrasaun koloniál nia okos.
Timor-Leste, nasaun ida-ne’ebé moris rasik prosesu deskolonizasaun, simu enkontru rejionál Pasífiku ne’e ho espíritu solidariedade, responsabilidade no esperansa.
Atu enkontru ida-ne’e bele kontribui ba hametin momentum internasionál ba mundu ida livre hosi kolonializmu, iha-ne’ebé povu hotu-hotu bele ezerse tomak sira-nia direitu ba liberdade, dignidade no hili sira-nia futuru rasik.
Jornalista : Hortencio Sanchez
Editór : Cancio Ximenes
