Komisaun F husu ba jestór sentru saúde hatama pedidu antesipadu ba INFPM
DILI, 20 Maiu 2025 (TATOLI)—Prezidente Komisaun F ne’ebé trata asuntu Saúde, Seguransa Sosiál no Igualdade Jéneru, Maria Gorumali Barreto, husu ba jestór sira iha sentru saúde no ospitál referrál sira atu hato’o pedidu antesipadu kona-ba falta ai-moruk ba Institutu Nasionál Farmásia no Produtu Médiku (INFPM).
“Ita sofre hela ai-moruk balun, vitamina no doze vasina iha INFPM, no ne’e afeta ba sentru saúde no klínika sira. Loos duni ita sofre hela maibé halo pedidu antesipadu ba IINFPM nune’e ai-moruk iha bele distribui daudaun,” Maria Bareto dehan ba jornalista sira iha Palásiu Prezidensiál, Bairru-Pité, tersa ne’e, relasiona ho falta ai-moruk iha sentru saúde no klínika sira.
Nia hateten, prosesu distribuisaun no akizisaun ai-moruk lori tempu, tanba ne’e importante atu hatama pedidu antesipadu kona-ba falta ai-moruk.
“Responsabilidade farmásia sira iha sentru no postu sira tenke aprezenta, labele hein to’o estoke ai-moruk hotu, entaun prosesu distribuisaun ne’e hahú bainhira mak sira hein to’o ai-moruk hotu,” nia hateten.
Deputadu ne’e reforsa bainhira persentajen estoke ai-moruk iha sentru no postu saúde sira tun tenke hato’o kedas pedidu atu evita ai-moruk laiha estoke.
Tuir deputada ne’e, Parlamentu Nasionál aprova orsamentu ba ospitál referál sira hamutuk ho bens servisu hodi halo akizisaun ba medikamentu bainhira iha estoke ai-moruk mamuk iha farmásia sira.
Prezidente Komisaun F rekoñese falta rekursu umanu
Iha biban ne’e, Prezidente Komisaun F, rekoñese katak tinan 23 ona Timor-Leste ukun-aan, maibé rekursu umanu kontinua problema iha fasilidade saúde sira.
“Ohin ita tama ona ba tinan 23 komemora Loron Restaurasaun Independénsia Timor-Leste nian, haree ba setór saúde katak ita iha sistema saúde ne’ebé mak sei problema mak rekursu umanu ne’ebé sei menus iha fasilidade saúde sira,” Maria Gorumali Barreto, hateten ba jornalista sira, banhira partisipa Loron Restaurasaun Independénsia dala XXIII, iha Palásiu Prezidénsia Repúblika.
Nia afirma, bá-oin tenke servisu integradu entre ministériu relevante ho Ministériu Obra Públika hodi haree ba bee-moos no fasilidade saúde sira.
“Ita iha fasilidade saúde balun, maibé seidauk asesu ba bee-moos. Ida-ne’e difikulta profisionál saúde sira-nia servisu, inklui liña eletrisidade ne’ebé mak mate-lakan, ida ne’e mós prejudika ba servisu atendimentu nian iha kada fasilidade saúde sira,” Maria haktuir.
Jornalista: Felicidade Ximenes
Editór: Xisto Freitas da Piedade
