DILI, 20 Maiu 2025 (TATOLI) – Ohin, kompleta tinan 23 Timor-Leste restaura nia independénsia. Iha ámbitu selebrasaun data ne’e, populasaun sira hato’o nia esperansa ba Governu iha loron importante ne’e.
Rosita Vitoriana, husi Masilidun, Tasi-Tolu, espera katak iha tinan 23 ne’e Governu hadi’a estrada no dada bee-moos.
“Ohin, ita komemora Loron Restaurasaun Indepedénsia ba da-23, nu’udar komunidade iha Masilidun, Danau tolu ninia esperansa ba ukun-na’in sira mak tau atensaun hadi’a estrada no dada bee-moos”, nia hateten ba Tatoli, ohin.
Hodi haktuir katak kondisaun estrada ladi’ak, nune’e iha tempu udan halo tahu maka’as no iha bailoron rai-rahun suar, nune’e difikulta tebes movimentu populasaun nian.
“Problema bee-moos, iha ne’e ami sosa de’it uza ba haris no tein. Baibain sosa bee karreta bombeiru fa’an kada masa jeriken ida sentavu 0,5 no karik profil litru 1000 nian dólar 5. Ami sosa de’it tanba bee posu ka sanyo ne’ebé iha [kontamina] masin”, akresenta.
Iha sorin seluk, João dos Santos, nu’udar estudante mós preokupa tebes kondisaun estrada iha Masilidun, ne’ebé ladún di’ak.
“Hela iha Masilidun, Danau tolu nian, la’o ho distánsia dook uitoan bá iha Eskola Nicolau Lobato nian, tanba estrada sai difikuldade, liuliu iha tempu udan tahu maka’as no bailoron rai- rahun suar”, nia lamenta.
Preokupasaun hanesan mós hato’o husi Martinho Soares nu’udar motorista ne’ebé baibain tula pasajeiru iha área Masilidun nian, tanba kondisaun estrada atuál difikulta nia atividade.
Haree ba kestaun ne’e, Xefe Suku Komoro, Elígio José Marçal, dehan parte autoridade lokál antes ne’e hato’o ona proposta ba Governu hodi bele tau atensaun estrada no bee-moos.
“Ita relata hotu ona ba, maibé lahetan atensaun tanba ne’e komunidade iha ne’ebá kontinua sosa bee-moos”, hato’o.
Bairru Masilidun, Tasi-Tolu, hola parte iha aldeia 12 Outubru, pertense ba suku Komoro, postu Dom Aleixo, munisípiu Dili.
Lembra katak, antes ne’e, liuhusi reuniaun plenária Parlamentu Nasionál, deputada husi Bankada PD, Sancha Tilman, no deputadu FRETILIN, António Calau, levanta ona kestaun estrada Masilidun hodi hodi husu ba entidade kompetente atu toma atensaun.
Reprezentante Governu, liuhusi Vise-Ministru Asuntu Parlamentár, Adérito Hugo da Costa, rejista preokupasaun no sei hato’o ba ministériu tutela hodi tau atensaun.
Jornalista: Nelson de Sousa
Editora: Maria Auxiliadora
