KOVALIMA, 20 Maiu 2025 (TATOLI) – Komunidade husi suku Lima postu administrativu Suai menus partisipa iha seremónia komemorasaun loron restaurasaun independénsia, 20 Maiu ba da-23 iha munisípiu Kovalima.
Xefe Suku Debos, Agostinho da Silva esplika katak razaun partisipasaun husi komunidade menus iha seremónia isar bandeira hodi komemora 20 Maiu tanba orsamentu la sufisente atu mobiliza komunidade sira.
“Orsamentu atu mobiliza komunidade kada suku aloka $100 ne’e la sufisente nune’e ita labele mobiliza komunidade barak. Bainhira atu mobiliza barak, presiza alimentasaun tanba suku mobiliza bazeia ba orsamentu ne’ebé mak aloka ba suku”, Xefe Suku Debos, Agostinho da Silva , dehan ba jornalista, hafoin seremónia isar bandeira, iha kampu Ladi, ohin.
Líder suku Debos ne’e dehan, ho alokasaun orsamentu husi postu administrativu ba suku atu mobiliza komunidade partisipa iha serimónia isar bandeira ne’e, husi suku fahe ba mobiliza komunidade iha loron 19 no loron 20 ohin.
Seremónia komemorasaun 20 Maiu ba da-23 iha munisípiu Kovalima 2025 ne’e, hanesan xefe Suku sentre triste tanba la iha kadeira ba xefe suku nune’e xefe suku sira tuur de’it iha sementi no komunidade balun tuur de’it iha rai.
“Ha’u hanesan xefe Suku Debos triste atu mobiliza populasaun atu partisipa iha restaurasaun independénsia ba dala-23 halo povu sira triste tanba povu barak no xefe suku sira tuur de’it iha rai sementi la iha kadeira”, nia informa.
Tanba ne’e nia rekomenda, atu labele akontese beibeik iha loron 19 Maiu, xefe suku sira mobiliza nia komunidade hala’o animasaun iha suku no iha loron 20 Maiu mak lori bandeira kada suku partisipa iha seremónia ofisiál isar bandeira.
Administradór Postu administrativu Suai, Idelfonso Maria Amaral esplika katak alokasaun orsamentu la sufisente atu mobiliza komunidade sira hodi partisipa iha seremónia komemorasaun loron independénsia ba da-23 iha kampu Ladi Suai.
“Alokasaun orsamentu husi munisípiu ba postu Suai hamutuk $ 650 husi orsamentu ne’e ami hala’o enkontru iha postu administrativu ne’ebé suku balun aloka osan $100 no suku balun aloka osan $ 115 atu mobiliza komunidade sira”, nia dehan.
Postu administrativu Suai ho nia suku sira hanesan, Suku Debos,Camnasa,Suku Suai Loro, Labarai no Suku Beco.
Ho alokasaun orsamentu hanesan autoridade postu administrativu ba futuru, iha Planu Asaun Anuál 2026 presiza prevee $ 1,000 ba postu administrativu Suai atu komemora loron nasionál sira hanesan 20 Maiu, 30 Agusto no 28 Novembru.
Jornalista:Celestina Teles
Editór: Rafael Ximenes de A. Belo
