MAE sei kontinua organiza espozisaun iha loron proklamasaun independénsia
DILI, 20 Maiu 2025 (TATOLI) – Ministru Administrasaun Estatál (MAE), Tomas do Rosário Cabral informa katak MAE sei kontinua loke espozisaun feira nasionál hodi komemora loron proklamasaun independénsia ba da-50, iha fulan-Novembru tinan ne’e.
Informasaun ne’e hateten bainhira ensera espozisaun feira nasionál ne’ebé loke durante loron lima iha ámbitu selebrasaun loron restaurasaun independénsia ba da-23 iha Portu Dili.
Ministru Administrasaun Estatal, Tomas do Rosário Cabral atu informa mós ba munisípiu sira-ne’ebé lahetan prémiu maibé hothotu hetan prezente atu lori ba munisípiu idaidak hanesan, LED, komputadór sei entrega ba sira.
“Nune’e ba manan-na’in sira atu prepara aan tanba ita sei halo fali kompetisaun iha loron 28 de Novembru”, Ministru ne’e informa iha atividade enseramentu eapozisaun feira nasionál iha Portu Dili.
Espozisaun ida-ne’e atu motiva servisu 19 ne’ebé iha kraik no iha fulan-Novembru munisípiu sira sei aprezenta mós rezultadu servisu territoriál sira.
No, Ministériu entrega ona ekipamentu ba munisípiu hotu-hotu signifika espozisaun iha loron 28 de Novembru sei lori rezultadu sira-ne’e mai aprezenta iha ne’e.
“Nune’e komisaun no juri bele avalia ho didi’ak ba dansa kulturias no múzika kulturál sira iha loron 28 de Novembru mai ita-boot sira prepara aan sei kompete ho ita-nia maluk sira-ne’ebé sei mai anima iha ita-nia festa”, membru Governu ne’e hateten.
Nia, hato’o parabéns ba munisípiu sira-ne’ebé hetan prémiu no sira-ne’ebé lahetan karik hadi’a aan para bele sai manan-na’in ba iha komemorasaun loron proklamasaun independénsia.
Nia agradese mós ba parte hothotu ne’ebé servisu hamutuk hodi realiza espozisaun ida-ne’e la’o ho di’ak to’o nia rohan.
Entretantu, iha atividade enserramentu ne’e fahe mós prémiu ba manan-na’in husi kategória tolu; dansa tradisionál, múzika tradisionál no kompetisaun barak, manan-na’in ba múzika tradisionál husi munisípiu Ainaru, manan-na’in ba dansa tradisionál husi munisípiu Ermera manan-na’in ba barraka husi munisípiu Lautem.
Atividade ne’e mós ensera husi Pimeiru Ministru no membru Governu sira. Entrentantu atividade ikus taka ho divertimentu husi artista lokál no nasionál.
Jornalista: Alexandra da Costa
Editor: Rafael Ximenes de A. Belo
