DILI, 20 Maiu 2025 (TATOLI) – Ministériu Edukasaun (ME) liderada Dulce de Jesus Soares, halo rekrutamentu ba manorin sira ba vaga sekundáriu ne’e ho rejime espesiál.
“Suspensaun ba rekrutamentu funsionáriu publiku, ne’e la prezudika ba vaga sekundáriu nian tanba ita halo rekrutamentu espesiál no ida-ne’e la’o nafatin, tanba profesor la’ós rejime jerál, maibé profesor rejime espesiál,” Ministra Dulce de Jesus, ba Tatoli, hafoin partisipa loron restaurasaun independénsia ba da-23, ne’ebé ho tema “Hametin Pas no Dezenvolvimentu”, iha Palásiu Prezidensiál, Bairru-Pité, Tersa ne’e.
Nia dehan relasiona ho desizaun Konsellu Ministru ne’ebé hodi halo suspensaun temporáriu ba rekrutamentu funsionáriu públiku foun, ne’e ba funsionáriu sira seluk.
“Tanba ne’e mak horisehik ita hahú teste, ne’e la prezudika mak teste la’o, sé prezudika teste la la’o. Imi haree teste ne’e Prezidende Repúblika José Ramos Horta halo abertura,” nia dehan.
Nune’e mós Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Loles Lemos, hatutan, ba edukasaun ne’e di’ak laiha problema.
“Ita halo teste ona ba bolsu kandidatu profesór sira, edukasaun la’o di’ak ne’e mak realiza ezame, sé la garante labele ezame, garante ne’e mak ezame la’o ona,” nia katak.
Jornalista : Osória Marques
Editór: Evaristo Soares Martins
