ME hasai ona sirkulár kada eskola iha territóriu hasa’e Bandeira Nasionál
DILI, 20 Maiu 2025 (TATOLI) – Komemorasaun restaurasaun independénsia ba da-23 ne’e, Ministériu Edukasaun (ME), hasai ona sirkulár ba kada eskola iha territóriu hodi hasa’e Bandeira iha idak-idak nia resintu eskola.
“Ministériu Edukasaun hasai sirkulár atu estudante hotu atu komemora loron restaurasaun independénsia iha sira-nia eskola. Ita-boot sira bele ba asesu iha eskola, ohin ha’u simu fotografia barak estudante sira halo ichar bandeira iha sira-nia eskola”, Ministra Dulce de Jesus dehan ba Tatoli, iha Palásiu Prezidensiál, Bairru-Pité, Tersa.
Ministériu Edukasaun la’ós la halo planu ba envolvimentu estudante iha komemorasaun restaurasaun independénsia tinan-tinan maibé ida-ne’e Ministériu Administrasaun Estatál (MAE), mak organiza, maibé keta haluha ekipa korpu ichar Bandeira ne’e maihusi estudante.
“Iha-ne’e Ministériu Administrasaun Estatál mak organiza la’ós Ministériu Edukasaun, ami depende ba karta husi Ministériu Administrasaun Estatál. Ita labele nega korpu ba ichar bandeira ne’e mós mai husi estudante, tanba tinan-tinan sé mak hasae bandeira? Estudante sira husi ensinu sekundáriu jerál.”
Nune’e iha selebrasaun loron restaurasaun independénsia ba da-23 mak Jivania Amado ne’e husi eskola Amigo de Jesus, Bekora, ne’ebé porta-bandeira RDTL iha loron restaurasaun independénsia ba da-23.
Jivania Jerónimo Amado da Cruz, tinan-16, mak figura selesiona ba ekipa korpu Ichar bandeira no sai porta-bandeira (pembawa bendera) nasionál RDTL ba komemorasaun loron restaurasaun independénsia nasionál da-23 iha Palásiu prezidensiál, Bairru-Pité, Dili, tinan ne’e.
Koñese portadór-bandeira
Naran kumpletu: Jivania Jerónimo Amado da Cruz
Loron no data moris: 24 fulan-Juñu 2009
Idade: 16 anos
Inan-aman: Celestina Jerónimo de Jesus (Doméstika) no Mario Lobo (Pesoál Bombeiros)
Desendente: Inan (Manufahi) no Aman (Ermera)
Estudu:
Ensinu báziku iha Amigo de Jesus (2020);
Ensinu báziku terseiru siklu iha Amigo de Jesus (2020);
Ensinu sekundáriu iha Amigo de Jesus (2024).
Jornalista : Osória Marques
Editór: Evaristo Soares Martins
