DILI, 21 Maiu 2025 (TATOLI)—Timor-Leste hetan sertifikadu, iha loron 19 Maiu, tinan ne’e, livre husi moras filariase linfátika husi Organizasaun Mundiál Saúde (OMS) iha Jenebra.
Moras filariase linfátika mak moras ema-nian ne’ebé kauza hosi parazita sira-ne’ebé hanaran filariase ne’ebé tranzmite hosi susuk nia tata. Jeralmente, moras ne’e la manifesta sintoma no ema balun iha sintoma elefantiasis iha sira-nia ain no liman.
Sertifikadu rekoñesimentu ne’e, aprezenta hosi Diretór Jerál OMS, Tedros Adhanom Ghebreyesus, ba Embaixadór Timor-Leste iha Jenebra, António da Conceição “Kalohan” iha loron dahuluk abertura Asembleia Mundiál Saúde iha Jenebra.
“Hanesan embaixadór, ha’u reprezenta Ministra Saúde timoroan nu’udár delegasaun ba Asembleia Jerál, ekipa OMS halo avaliasaun ba situasaun saúde iha Timor-Leste, liuliu moras sira hanesan filariase linfátika (ainpotis), tanba Timor-Leste konsege kombate no halakon ona moras ne’e,” Embaixadór Timor-Leste iha Jenebra, António da Conceição hato’o ba TATOLI via WhatsApp, kuarta ne’e.
Tuir diplomata ne’e, Timor-Leste sente orgullu hodi Selebra Aniversária Restaurasaun Independénsia ba dala XXIII ho progresu iha setór saúde.
“Sertifikadu ne’e atribui no entrega mai Timor-Leste nu’udár rekoñesimentu ba esforsu Ministériu Saúde nian, liuliu atendimentu ne’ebé hala’o ba populasaun,” nia dehan.
Embaixadór ne’e informa katak nasaun idak-idak halo hela asaun hodi espresa sira-nia hakarak atu koopera ho nasaun sira iha mundu tomak, ho objetivu atu kombate moras sira-ne’ebé afeta populasaun globál. Karik akontese pandemia ruma iha futuru, nasaun sira bele aloka rekursu finanseiru hodi hametin servisu OMS nian.
“Entre loron 19 no 27 Maiu iha Jenebra, ami hala’o Asembleia Mundiál Saúde nian, iha-ne’ebé ministru hotu-hotu husi mundu tomak partisipa hodi halibur ideia no mekanizmu kona-ba situasaun saúde ba nasaun hotu-hotu nune’e bele tulun malu no foti asaun hasoru moras ne’ebé afeta populasaun iha mundu tomak, hanesan pandemia COVID-19,” nia konklui.
Jornalista: Felicidade Ximenes
Editór: Xisto Freitas da Piedade
