Top

CAC halo identifikasaun ba eis Xefe Suku Seloi-Kraik

Komisáriu CAC, Rui Pereira dos Santos. Imajen TATOLI/Francisco Sony

DILI, 22  Maiu 2025 (TATOLI)—Komisaun Antí Korrupsaun (CAC-sigla portugés) halo identifikasaun ba atuál Xefe Gabinete Prezidente Autoridade Munisipál (PAM) Aileu ho inisiál GM tanba komete irregularidade liga ho utiliza sala osan suku bainhira asumi kargu nu’udár Xefe Suku Seloi-Kraik, Postu Administrativu Aileu, tinan hirak bá kotuk.

Nune’e, Komisaun Antí Korrupasaun halo buska ba GM iha nia servisu fatin, edifisiu Prezidente Autoridade Munisipál Aileu, nune’e lori kedas GM mai iha edifísiu CAC, Faról, hodi submete ba identifikasaun.

Komisáriu CAC, Rui Pereira dos Santos, hateten kuandu CAC halo buska ne’e ho intensaun atu halo identifikasaun ba ema ida-ne’ebé envolve kazu ruma.

“Ba kazu ida-ne’e, konserteja iha irregularidade mak CAC halo identifikasaun ne’e. CAC halo servisu ida-ne’e bazeia ba keixa no informasaun balun ne’ebé CAC simu. Tanba ne’e, CAC halo halo identifikasaun no halo averiguasaun. Kuandu identifikasaun no averigusaun hotu mak iha prova sufisiente katak indísiu krime, sei kontinua bá-oin,” Komisáriu Rui hateten ba jornalista Tatoli iha Palásiu Prezidensiál, foin lalais ne’e.

Nia esplika, CAC halo identifikasaun ba Xefe Gabinete PAM Aileu ne’e iha loron 12 Maiu  2025 maibé hanesan  Komisáriu seidauk simu relatoriu konaba asaun neebe mak CAC halo tanba antes Komisáriu halo servisu iha Rejiaun Administrativu Espesial Oecusse Ambeno no ohin mak foin tama.

“Ha’u seidauk hatene ekipa na’in hira mak tun bá iha terrenu ne’e, maibé en-prinsípiu CAC halo servisu iha terrenu liga ho prosesu ruma. CAC  la naran halo identifikasaun ba ema ruma”, nia afirma.

Rui dehan, identifikasaun ne’ebé CAC halo ne’e atu asegura dokumentu ruma, dalaruma CAC ba buka ema no ema ne’e bele halo lakon tiha dokumentu no faktu sira, tanba ne’e maka iha loron ne’ebá ekipa halo aprensaun haree mós ida-ne’e.

Jornalista: Natalino Costa

Editór: Xisto Freitas da Piedade

Publisidade

Leave a Reply

Latest Post

error: Content is protected !!