DILI, 22 Maiu 2025 (TATOLI) – Reuniaun Konsellu Ministru kuarta ne’e, aprova ona proposta lei hodi kontrola pestisida iha territóriu nasionál.
Ministru Agrikultura, Pekuária, Peska no Floresta, Marcos da Cruz, esplika, objetivu hosi proposta lei ida-ne’e mak atu regula, iha territóriu nasionál tomak, lisensiamentu, importasaun no esportasaun, produsaun, fa’an no distribuisaun, utilizasaun, embalajen no soe pestisida sira, inklui pestisida agríkola sira, iha faze hotuhotu husi sira-nia siklu moris.
“Ohin ha’u aprezenta kona ba lei pestisida, ne’ebé ohin hetan ona aprovasaun, depois sei lori ba iha Parlamentu Nasionál, sei halo diskusaun iha Parlamentu, ida ne’e ho objetivu atu proteje saúde ema nian, saúde animál no ai-horis nian, ambiente tasi no terrestre, nune’e mós promove produsaun agríkola ne’ebé sustentável iha Timor-Leste,” Marcos da Cruz, hateten iha Palásiu Governu.
Nia esplika, lei pestisida ne’e importante tebes tanba presiza regula utilizasaun lisensiamentu ba pestisida ai-moruk hodi hamate peste iha nia natar, to’os nomós ema balun uza ai-moruk pestisida hodi hamate fali ikan, boek, entaun presiza regula tanba ai-moruk ne’e bele afeta mós ba ema-nia saúde, no animál nia saúde no inklui ai-horis sira.
Daudaun ministériu halo uluk lei regula pestesida hafoin kria tan dekretu ida hodi implementa laboratóriu halo teste ba pestesida estrada ai-han no ai-horis sira.
“Kuandu lei ne’e aprova ona, ita sei dezenvolve tan dekretu lei ida hodi haree hotu assuntu sira ne’e, inklui laboratóriu, rekursu umanu no parte instituisaun relavante sira, Ministériu Komérsiu Indústria, sei iha kordenasaun servisu oinsá implimenta lei ho di’ak,” nia konklui.
Jornalista : Arminda Fonseca
Editór: Evaristo Soares Martins
