Governu estende kontratu projetu manutensaun estrada Baukau-Vikeke
DILI, 22 Maiu 2025 (TATOLI) – Konsellu Ministru, kuarta ne’e, deside atu autoriza estensaun kontratu ba kompañia Conecta Intercontinental husi Índia ne’ebé daudaun halo konstrusaun estrada husi Baukau ba Venilale no Venilale ba Vikeke.
Ministru Obra Públika, Samuel Marçal hateten, Governu desde halo estensaun ba kontratu konsultór supervizaun hodi superviziona nafatin obra ne’ebé agora la’ó hela, husi parte Venilale nian to’o iha Ossu no Vikeke, razaun halo estensaun tanba kontratu ne’e mate tiha ona, tenke halo estensaun fali, nomós tanba tenke aumenta tán servisu ba sira hodi superviziona tán iha parte husi Venilale to’o iha Asalaitula estensaun ba ne’ebá nune’e ho kompañia GRIG-COVEC halo supervizaun ba iha estrada sira-ne’ebá.
“Estensaun ne’e to’o 31 Janeiru 2026, ba servisu konsultoria supervizaun nian iha ámbitu Lote 1 hosi projetu estrada Baucau–Venilale no Lote 2 Venilale–Viqueque. Estensaun ne’e implika aumentu iha valór kontratu nian, ne’ebé sa’e hosi dolar amerikanu millaun $ 5,78 ba dolar amerikanu millaun 6,73, ne’ebé korresponde ba aumentu maizumenus dolar amerikanu rihun $954,”Samuel Marçal, hateten iha Palásiu Governu, Dili.
Lembra katak iha loron 24 Marsu 2024, reuniaun Konsellu aprova proposta ne’ebé aprezenta husi Ministru Obra Públika, Samuel Marçal, kona-ba adenda kontratu ba projetu konstrusaun estrada.
Adenda kontratu ICB/046/MOPTC/2017, kona-ba estensaun períodu konstrusaun ba projetu melloria no manutensaun estrada liga munisípiu Baucau bá postu administrativu Venilale to’o munisípiu Viqueque. Lote 2 Venilale – Viqueque (Sta 27+120 62’101) sei implika estensaun prazu kontratuál to’o loron 29 Juñu 2024.
Governante ne’e dehan, progresu fíziku ba projetu ne’e atinje liu ona 80%, atu kontinua to’o finalizasaun maka Governu deside estende hodi termina obra ne’e.
Enkuantu adenda kontratu seluk RFP/003/MOP-2018 kona-ba estensaun kontratu servisu supervizaun ba obra hadi’a estrada entre Baukau-Venilale-Viqueque. Lote 2 Venilale-Viqueque (Sta 27+120 62’101) sei implika kustu adisionál ida ho valór kontratu rihun $903 no estensaun prazu kontratu to’o loron 30 Juñu 2025.
Jornalista : Arminda Fonseca
Editór : Evaristo Soares Martins
