DILI, 22 Maiu 2025 (TATOLI) – Reuniaun Konsellu Ministru kuarta ne’e, analiza aprezentasaun kona-ba opsaun polítika no lejizlativa husi Proposta Lei kona-ba Rejime Jerál Sistema atividade bankária no atividade finanseira.
Proposta ne’e aprezenta husi Gabinete Vise-Primeiru-Ministru no Ministru Koordenadór Asuntu Ekonómiku, Francisco Kalbuadi Lay no Governadór Banku Sentrál Timor-Leste (BCTL), Helder Lopes.
Bazeia ba nota imprensa ne’ebé TATOLI asesa ohin katak, proposta ne’e analiza hela hakarak estabelese enkuadramentu legál foun ba funsionamentu sistema finanseiru nasionál.
“Ida-ne’e ho objetivu atu promove estabilidade, konfiansa no efisiénsia iha setór bankáriu no finanseiru iha Timor-Leste. Rejime futuru hakarak mós aliña lejizlasaun nasionál ho prinsípiu internasionál sira fiskalizasaun no regulasaun nian, atu nune’e bele kria kondisaun forte liután ba dezenvolvimentu ekonomia moderna, dinámika no inkluziva,” nota imprensa ne’e fundamenta.
Jornalista : Arminda Fonseca
Editór : Evaristo Soares Martins
