DILI, 22 Maiu 2025 (TATOLI)—Primeiru-Ministru (PM), Kay Rala Xanana Gusmão, kinta ne’e, hasoru malu ho Prezidente Repúblika (PR) José Ramos Horta hodi ko’alia kona-ba problema dezempregu ne’ebé kontinua buras iha Timor-Leste.
Notísia Relevante: Dezempregu Kontribui Númeru Kazu Iha Timor-Leste
“Problema boot ne’ebé ami ko’alia ohin mak problema dezempregu. Ne’ebé, ha’u dehan ba Prezidente Repúblika iha planu oinsá mak bele dudu ita-nia setór ekonómika,” Xefe Governu ne’e hateten ba jornalista sira hafoin ramata reuniaun ho Xefe Estadu.
Aleinde ko’alia kona-ba dezempregu iha Timor-Leste, Xefe Governu mós preokupa ho joven sira agora kaer de’it mak telefone hodi lakohi halo servisu ruma.
“Susar tebes mak agora ema hotu kaer de’it telefone, labarik sira kiikoan lee lahatene ne’e mós kaer mak ida-ne’e. Susar tebes no sira lakohi halo servisu maibé hakarak servisu iha komputadór oin. Problema boot mak ida-ne’e, maibé ita haree took hodi buka solusaun,” Xanana tenik.
Governu, nia dehan, daudaun ne’e tau ona hanoin ba populasaun sira liuliu jerasaun foun sira lalika buka servisu iha fatin moos maibé tenke iha ona hanoin atu partisipa iha dezenvolvimentu ne’e.
Tuir Xefe Governu katak, Governu hanoin atu redús importasaun maibé tenke iha hanoin jerasaun foun sira tenke tau iha konsiénsia katak empregu la’ós Estadu mak fó maibé tenke kria rasik empregu ba aan rasik, loron ida ekonomia rai-laran sa’e maka’as bele hamenus importasaun.
“Ita haree ona katak, tinan mai ne’e sei harii Banku Dezenvolvimentu Nasionál hodi fó impréstimu ho nia funan kiik-liu atu dudu mikro pekeña ho mediu empreza, lae ita susar,” Xanana dehan.
Bainhira Banku Dezenvolvimentu Nasionál la’o, iha ona prespetiva husi juventude atu kria empregu ba aan rasik no fó servisu ba ema seluk.
Entretantu, kona-ba saláriu mínimu ne’e, Xefe Governu ne’e subliña bainhira halo mudansa ba sistema ne’e sei haree didi’ak husi parte hotu, maibé líder ne’e husu ba públiku labele preokupa barak Governu sei kurije sasán sira hotu iha nia Governasaun, atu nune’e bele lori Timor-Leste ba oin.
“Empregu ne’e la’ós dehan iha Timor laiha, ita-nia problema ne’e mak laiha oportunidade ba jerasaun foun sira atu hakbiit nia aan rasik hodi halo buat ruma. Maibé, nova jerasaun agora ita temi de’it agrikultura lakohi, tanba hakarak hatais moos, lakohi foer ne’e mak problema boot, problema ne’e iha mentalidade,” Xanana dehan.
Notísia Relevante: 2027-2028: Era foun kompetisaun entre jerasaun tuan no foun iha Timor-Leste
Jornalista : Hortencio Sanchez
Edit’or : Cancio Ximenes
