DILI, 22 Maiu 2025 (TATOLI)-Ministériu Finansa liuhusi Institutu Nasionál Estatístika Timor-Leste (INETL) lansa relatóriu Índise Presu Konsumidór (IPK) Abríl nian hatudu katak inflasun iha fulan ne’e sa’e 0,1% kompara ho fulan Marsu sa’e 0,8%.
Prezidente INETL, Elias dos Santos, hateten, mudansa presu grupu hotu sa’e tanba grupu hahán no bebida la’ós alkoólika sa’e 0,4%, rekreasaun no kultura sa’e 0,6%, ekipamentu no manutensaun mobiláriu uma-laran sa’e 0,4% no hatais no sapatu sa’e 0,3%.
“Ita ko’alia kona-ba grupu alkoólika no tabaku nian tun 1,6%, no transporte tún 0,1%, ida-ne’e sai hanesan mudansa kontráriu ba inflasaun grupu hotu mensál,” Elias dos Santos, hateten, iha nia edifísiu INETL, Kaikoli, Dili, kinta ne’e.
Nia subliña, grupu hahán no bebida la’ós alkoólika sa’e 0,4% tanba hetan impaktu maioria husi sub grupu modo-tahan sa’e 3,5%, mina no bokur sa’e 1,4% no na’an sa’e 0,3%.
Nia haktuir, ba sub grupu foos nian tún 1,0%, masin-midar, marmelada, bani-been, Cokolate no hahán midar tún 2,5%, susu-been, keiju no manu-tolun tun 0,7%, ikan no hahán tasi tun 0,7%, no ai-fuan tun 0,9% sai hanesan mudansa kontrariu ba inflasaun grupu hahán no bebida la’ós alkoólika.
“Ia haree mudansa persentajen IPK anuál sa’e 0,5% kompara entre fulan Abríl 2025 ho fulan-Abril 2024, hetan kontribuisaun husi grupu hahán no bebida la’os alkoólika sa’e 1,0%, edukasaun sa’e 0,4%, ekipamentu no manutensaun mobiláriu uma-laran sa’e 0,8%, uma sa’e 0,4%, hatais no sapatu sa’e 0,8%, rekreasaun no kultura sa’e 0,6% ba anuál Abril 2025,” nia dehan.
Enkuantu kona-ba grupu alkoól no tabaku nian tun 1,4%, transporte tún 1,7% no komunikasaun tún 0,9%, ida-ne’e sai hanesan mudansa kontráriu ba inflasaun grupu hotu ba anuál Abril 2025.
Nia adianta, kona-ba inflasaun tradeable nian sa’e 0,2% no non-tradeable laiha mudansa (0.0%) iha mensál, kompara entre fulan Abríl, tinan-2025 ho fulan Marsu, tinan-2025.
Nia haktuir kona-ba inflasaun tradeable nian sa’e 0,5% no non-tradeable sa’e 0,5% iha anuál, kompara entre fulan Abríl, tinan 2025 ho fulan Abríl, tinan 2024.
Notisía relevante : INETL rejista inflasaun iha Marsu sa’e 0,8%
Jornalisa : Arminda Fonseca
Editór : Evaristo Soares Martins
