Komisaun B PN partilla pontu tolu ba PNTL Kovalima
KOVALIMA, 22 Maiu 2025 (TATOLI) – Komisaun B Parlamentu Nasionál (PN) ne’ebé trata asuntu negósiu estranjeiru no defeza ho seguransa, kinta ne’e, hala’o fiskalizasaun hodi partilla pontu tolu ba Komandu Polísia Nasionál Timor-Leste (PNTL) iha Munisípiu Kovalima.
Prezidente Komisaun B Parlamentu Nasionál, Domingos Agosto ‘Deker’, informa katak pontu tolu ne’e mak hanesan konfirma situasaun enjerál seguransa, ezekusaun orsamentu PNTL Kovalima no saida mak difikulta atu dezempeña PNTL nia knaar.
“Ohin Komisaun B PN mai iha Komandu PNTL munisípiu Kovalima hanesan programa kontinuasaun vizita fiskalizasaun nune’e ami partilla pontu prinsipál tolu ba Polísia Nasionál Timor-Leste, iha munisípiu Kovalima”, Domingos Agosto ‘Deker’ dehan ba jornalista sira hafoin enkontru iha Komandu PNTL Kovalima, Santa Rosa, ohin.
Iha atividade fiskalizasaun komisaun B PN ne’e, ba pontu dahuluk, atu konfirma situasaun seguransa enjerál iha Kovalima oinsá atu haree liga ho aspetu oioin hanesan Grupu arte marsiál no Arte rituál.
Pontu ba daruak, ezekusaun orsamentu jerál Estadu 2024 no 2025 nia atinjimentu no preokupasaun sira ne’ebé liga difikuldade PNTL Kovalima enfrenta hodi konfirma nia resposta husi Ministériu Interiór (MI) ba komandu oinsá no pontu ba datoluk mak difikuldade sira.
Iha diskusaun, Komandu PNTL aprezenta difikuldade sira – asuntu sira lubuk ida, maibé bazeia ba proposta ne’ebé PNTL hato’o ba Ministériu Interiór hetan ona resposta balun, hanesan haree ba infraestrutura bazeia ba kapasidade Ministériu Interiór ( MI)
“Tuir informasaun ne’ebé ami asesu tinan ne’e komandu PNTL hetan oportunidade hodi halo konstrusaun ba komandu PNTL no eskuadra balun no kazerna ba PNTL no preukupasaun seluk mak menus rekursu umanu, transporte, komunikasaun uza telefone no seluk”, nia informa.
Ho preukupasaun ne’ebé komandu aprezenta, Komisaun B PN labele fó resposta tanba iha separasaun podér, Parlamentu Nasionál nia knaar rona no anota nune’e bele ebalora liuhusi relatóriu hodi submete ba MI atu bele responde.
Tuir ajenda, hafoin finaliza enkontru iha komandu PNTL Kovalima, kontinua hala’o fiskalizasaun iha Autoridade Protesaun Sívil (APC-sigla portugés) no iha fronteira mota-masin atu haree servisu husi imigrasaun sira.
Iha sorin seluk, Reprezentante Komandante PNTL Munisípiu Kovalima, Superintendente Asistente Polísia , Joaquim da Costa reforsa, Komisaun B parlamentu Nasionál nia prezensa iha komandu PNTL Kovalima atu hala’o fiskalizasaun kona-ba servisu PNTL iha Kovalima.
“Komisaun B PN nia prezensa ne’e atu haree liu difikuldade ne’ebé ami enfrenta no orsamentu PNTL tuir livru orsamentu hodi hatene nia ezekusaun no atu haree oinsá mak asegura seguransa jerál iha Kovalima”, nia hateten.
Superintendente asistente mós aprezenta ezekusaun orsamentu, bazeia ba livru orsamentu PNTL, tanba nia ezekuta orsamentu ba viajen lokál no atividade polisiamentu komunitária ne’ebé seidauk foti orsamentu husi komandu, maibé hetan apoiu husi parseiru The Asean Fundation, orsamentu kona-ba dezenvolvimentu infraestrutura no sira seluk konsentra iha komandu Jerál PNTL.
Jornalista:Celestina Teles
Editór: Rafael Ximenes de A. Belo
