Konstrusaun edifísiu SEFOPE Vikeke finaliza ona
VIKEKE, 22 Maiu 2025 (TATOLI)—Diretór Sekretáriu Estadu Formasaun Profesionál no Empregu (SEFOPE), Norberto Pereira Martins, informa progresu konstrusaun edifísiu SEFOPE iha aldeia Sira-Lari, suku Caraubalu, postu Vikeke Vila, munisípiu Vikeke, servisu fíziku finaliza ona no daudaun ne’e hela prosesu inaugurasaun.
“Obra konstrusaun edifísiu SEFOPE ne’ebé konstrui iha Vikeke agora daudaun servisu fíziku atinjimentu 100%. Ita bele hateten katak servisu finál ona, ne’ebé ita hein atu simu de’it edifísiu,” Norberto Pereira Martins hateten ba Agência Tatoli, iha ninia kna’ar fatin, ohin.
Tuir nia, nia parte simu ona informasaun husi diresaun PDIM katak daudaun ne’e empreza responsável tau ona plaka iha edifísiu SEFOPE nian ne’ebé edifísiu ne’e sei inaugura husi Governu lihusi Ministériu Administrasaun Estatal (MAE) hafoin entrega ba SEFOPE.
“Nune’e, ami nafatin halo koordenasaun ho diresaun PDIM. Kona-ba serimónia inaugurasaun seidauk serteza, ne’ebé ami sei tenta ho PDIM ba data tentativa inaugura edifísiu SEFOPE,” nia dehan.
Nia hateten, edifísiu SEFOPE foun ne’e sei fó espasu ba funsionáriu SEFOPE munisípiu Vikeke hodi fó atendementu ba joven sira no komunidade iha munisípiu Vikeke, tanba edifísiu atuál ne’ebé SEFOPE uza ne’e ninia espasu kloot hodi difikulta ba funsionáriu sira halo atendementu.
“Ho edifísiu foun ne’e, ha’u sente ba ami sufisiente ba prosesu atendementu ba ita-nia joven sira-ne’ebé hakarak servisu ba rai-li’ur no rai-laran. Diresaun SEFOPE ne’e territoriál maibé ita bele hetan orsamentu husi munisípiu nian hodi konstrui edifísiu. Ha’u hato’o agradesementu ba autoridade Vikeke ne’ebé konstrui ona edifísiu ba ami, hodi uza atendementu ba ita-nia abitante Vikeke,” nia hateten.
Enkuantu, projetu konstrusaun edifísiu SEFOPE Vikeke no morru protesaun, konstrui husi empreza Sovilhosna Unipesoál, Lda, ho kustu konstrusaun hamutuk $258,680.21.
Jornalista : Vitorino Lopes da Costa
Editór : Cancio Ximenes
