DILI, 22 Maiu 2025 (TATOLI)—Diretór Jerál Servisu Rejistu Notariadu, Agostinho Gonçalves Vieira, hateten Ministériu Justisa (MJ) liuhusi Diresaun Servisu Rejistu Notariadu hadi’a ona jeradór nune’e kuandu ahi mate bele lakan automátikamente atu apoiu servisu atendimentu públiku.
“Notariadu iha jeradór maibé avaria ona, entaun ami koordena ho Ministériu Justisa foin daudaun hadi’a ona jeradór. Jeradór ne’e nia matéria mak ladi’ak (avaria iha batria). Agora funsiona hikas,” Agostinho hateten ba Tatoli iha nia kna’ar fatin, Kolmera, kinta ne’e.
Nia dehan, la lembra kustu matéria ne’e hira, maibé hanesan Diretor Jerál Notariadu sente kontente tanba jeradór ne’e funsiona hikas hodibele ajuda servisu Notariadu liga ba emisaun Pasaporte, Billete Identidade no Rejistu Kriminál.
“Ita-boot sira hatene durante ne’e ahi mate derepente, afeta ba atendimentu iha Notariadu. Entaun, agora, jeradór funsiona hikas ona. Agradese boot tanba kuandu ahi mate jeradór ne’e bele moris automatikamente,” nia konklui.
Jornalista: Natalino Costa
Editór: Xisto Freitas da Piedade
