KOVALIMA, 22 Maiu 2025 (TATOLI) – Tribunál Munisípiu Kovalima (TDM), kinta-ne’e, deside adia julgamentu primeiru Interrogatóriu ba konsilleiru másimu, Naimori dos Santos ‘Bukar’, ne’ebé ho tipu kazu ba furtu agravadu.
Ministériu Públiku hasai notifikasaun hodi akuza konsilleiru másimu Naimori dos Santos ‘Bukar’ ho krime furtu agravadu ne’ebé prevista artigu 252.o iha númeru 1 iha alinea A, D ho K , kodigu penál Timor-Leste (TL).
Kódigu penál TL alinea A (Ema seluk nia sasán movel ne’ebé iha folin boot ho valór sientífiku, artístiku ka istóriku, ka sai importante ba dezenvolvimentu ekonómiku ka teknolójiku), D (La susar ema aproveita kalan hodi na’ók), K (Krime ne’e pratika husi ema na’in-tolu ka liu inklui mós ema ne’e).
Konsilleiru Másimu Naimori dos Santos ‘Bukar’ nia prezensa iha Tribunál hodi tuir julgamentu relasioná foti fatuk-lulik iha foho Bebo Tutun Hatudo Munisípiu Ainaro ne’ebé ho kazu furtu agravadu ne’ebé suspeita arguidu na’in-tolu mak foti fatuk-lulik iha 2023, maibé prosesu julgamentu labele hala’o, tanba konflitu interrese husi arguidu na’in-tolu ne’ebé balun hakarak uza defensór Públiku no advogadu privadu.
Kazu fatuk-lulik ne’ebé lakon suspeitadu foti husi arguidu na’in-tolu iha 2023 hodi tau iha palásiu Korka Ainaro maibé Polísia Investigasaun Kriminál foti hikas fatuk referidu tau fali iha foho Bobe tutun hodi hatuur hikas iha aldeia Bobe postu administrativu Hatudo, munisípiu Ainaro.
“Iha prosesu julgamentu, arguidu na’in-tolu mak hetan nia defensór Públiku na’in-ida de’it, tanba iha konflitu ba interrese ba sira-nia deklarasaun , tanba ne’e TDS adia julgamentu”, Advogadu Privadu Naimori dos Santos ‘Bukar’, Ismael Lopes informa ba jornalista hafoin hala’o julgamentu iha sala audiénsia TDS suai, ohin.
Tuir planu julgamentu ne’e sei hala’o fali iha Tribunál Munisípiu Kovalima (TDM) iha loron 17 Jullu 2025 ne’ebé audénsia julgamentu sei hahú iha tuku 09 dadeer oras Timor-Leste.
Notísia relevante:PNTL submete kazu furtu agravadu envolve Naimori ba Ministériu Públiku Suai
Jornalista:Celestina Teles
Editór: Rafael Ximenes de A. Belo
