DILI, 23 Maiu 2025 (TATOLI)—Governu Austrália liuhusi Programa Pacific Austrália Labour Mobility (PALM), sesta ne’e, entrega internet Starlink ba Sekretaria Estadu Formasaun Profisionál no Empregu (SEFOPE) hodi fasilita servisu ho lais.
“Ita hatene katak formasaun ne’ebé mak agora ita lori ona bá munisípiu, ita-nia kandidatu barak mak presiza update sira-nia perfíl no atu realiza ida-ne’e presiza liña internet,” Sekretáriu Estadu Formasaun Profisionál no Empregu, Rogério de Araújo Mendonça, informa ba jornalista sira, iha Timor-Plaza.
Nia dehan, iha tinan hirak liubá joven hotu-hotu konsentra iha kapitál, entaun ohin ida-ne’e internet lori filafali bá diresaun SEFOPE munisípiu nune’e bele fasilita joven sira-ne’ebé mak hamutuk rihun 55 halo ona teste.
“Meiu ne’ebé mak ajuda husi Governu Austrália ne’e ajuda tebes Governu Timor-Leste liuhusi SEFOPE atu halo atendimentu públiku ba ita-nia kliente sira-ne’ebé mak presiza update sira-nia perfíl, nune’e empregadór sira iha Austrália bele asesu ba ita-nia kandidatu sira-ne’e hodibele halo entrevista,” nia dehan.
Iha fatin hanesan, Reprezentante Embaixadora Austrália iha Timor-Leste, Penny Roberts, esplika ohin loron marka loron ne’ebé iha signifikadu tebes no loron ne’ebé impaktu boot tebes liuliu iha komponente efesiénsia no transparente ba iha programa mobilidade laborál.
“Atividade ohin loron mak asegura katak fasilidade no oportunidade la’ós ba nasionál de’it, maibé ita sei loke luan bá iha munisípiu hotu. Objetivu prinsipál husi SEFOPE mak atu loke asesibilidade ba territóriu tomak nune’e fó oportunidade ba timoroan hotu atu asesu ba programa mobilidade laborál,” nia informa.
Jornalista: Felicidade Ximenes
Editór: Xisto Freitas da Piedade
