KOVALIMA, 23 Maiu 2025 (TATOLI) –Tribunál Munisípiu Kovalima primeira instánsia halo julgamentu iha desizaun ba kondenasaun ba prizaun no mós aplika pena multa tanba ne’e daudaun-ne’e kontribui reseita $ 28,321,38 ba kofre Estadu.
“Iha atividade julgamentu iha desizaun kondenasaun prisaun no bele mós aplika pena multa. Entaun, ita kontribui reseita. Aleinde husi pena multa, Tribunál aplika iha kustu pagamentu, indeminizasaun sivíl ba krimi korrupsaun, balun devolve osan Estadu entrega no Tribunál kontribui fali reseita ba kofre Estadu”, Juís Administradór Tribunál Munisípiu Kovalima, Naasson Doutel Sarmento, relata dadus ne’e ba jornalista, iha Tribunál munisípiu Kovalima, ohin.
Ho nune’e, hahú Janeiru to’o Abríl 2025 ne’e, Tribunál Munisípiu Kovalima primeira instánsia konstribui ona reseita $ 28,321.38 ba kofre Estadu ne’ebé nia fonte orsamentu mai husi desizaun.
Juís klarifika, reseita ne’ebé Tribunál kontribui depende husi desizaun – bainhira kondena arguidu provadu komete krime kontra bandu, aplika multa loron hira, hanesan loron 90 taxa diáriu $ 1.00 entaun hetan $ 90.00 bainhira multa loron 120 taxa diáriu $ 1.00 totál osan $ 120.00.
Aleinde aplika kustu bainhira hetan asisténsia husi defensór Públiku inzenta kustu, bainhira uza advogadu privadu kondena atu selu kusta judisiál minímu ba prosesu singulár $ 10, prosesu koletivu mínimu $ 20.
“Ami aplika kustu bainhira haree kondisaun pesoál nia rendimentu di’ak atu selu aplika multa. Ba objetu apreendidu sasan tama iha valór ekonómiku hanesan mina-rai ilegál , bebida Cocakola, Sprite, ita haree sasan sira di’ak. Tribunál konsulta ho instituisuan relevante bainhira iha kualidade di’ak bele venda. Ita venda tuir valór merkadória nune’e bele kontribui reseita ba kofre Estadu”, nia hateten.
“Kona-ba sigarru, juís hotu iha Tribunál Munisípiu Kovalima, ita-nia desizaun uniforme hodi halo distruisaun, dekretu-lei la fó dalan sirkulasaun sigarru tanba haree ba kestaun saúde públiku sidadaun sira nian,” autoridade justisa ne’e dehan.
Juís Administradór Tribunál Munisípiu Kovalima, Naasson Doutel Sarmento aleinde relata reseita iha 2025 nia mós relata reseita husi 2024 ne’ebé kontribui reseita hamutuk $ $69.282,95 ne’ebé nia fonte orsamentu depende mai husi desizaun atividade julgamentu. Iha prosesu hala’o julgamentu desizaun iha mós kondenasaun prizaun no bele mós aplika multa.
Jornalista:Celestina Teles
Editór: Rafael Ximenes de A. Belo
