SEFOPE atribui sertifikadu ba kandidatu traballadór Austrália na’in-210 iha Vikeke
VIKEKE, 24 maiu 2025 (TATOLI)-Sekretáriu Estadu Formasaun Profesionál no Empregu (SEFOPE) distribui sertifikadu lian inglés ba formandu kandidatu traballadór Austrália na’in-210 iha munisípiu Vikeke.
Iha distribuisaun sertifikadu ne’e, Diretór Jerál Koorporativu husi SEFOPE, Nelson Soares Carvalho, haktuir polítika IX Governu liuhusi SEFOPE deside lori formasaun lian inglés hakbesik mai munisípiu sira atu fasilita joven sira-ne’ebé família problema ekonómia, sira bele partisipa formasaun iha munisípiu.
“Maibé, formasaun lian inglés ne’ebé ho durasaun fulan tolu ba joven sira hodi prepara an. Durante ne’e, ita-nia joven sira iha munisípiu Vikeke hamutuk na’in-210 finaliza ona sira-nia formasaun no ita distribui ona sertifikadu ba sira. Nune’e mós sertifikadu ne’ebé ami oferese ba formandu sira tenke responsabiliza hatene lian inglés, tenke buka hatene barak liután”, Nelson Soares Carvalho, hateten iha serimónia distribui sertifikadu, iha salaun administrasaun Vikeke, ohin.
Kandidatu traballadór Austrália husi munisípiu Vikeke nian ne’ebé naran tama iha sistema SEFOPE hamutuk 3.777, husi númeru ne’e foin na’in-210 finaliza formasaun lian inglés.
“Ita sei buka oinsá para ita-nia joven sira-ne’e bele tuir hotu formasaun. Ha’u husu joven sira tenke buka aprende barak”, nia husu.
Joven na’in-210 finaliza formasaun iha Vikeke hodi bele ba kompete iha merkadu servisu iha rai laran nomós rai li”ur.
Tuir dadús formandu kandidatu traballadór ne’ebé finaliza formasaun faze dahuluk hamutuk 210, husi númeru ne’e ema na’in-17 hetan valór verry good no valór good hamutuk 193.
Iha fatin hanesan, Sekretáriu Munisípiu Vikeke asuntu Sosiál no Organizasaun Komunitária, Acacio de Sousa, husu agradese ba SEFOPE tanba oferese ona formasaun lian inglés ba joven Vikeke-oan sira hodi prepara aan ba servisu iha rai li’ur.
“Ha’u sente IX Governu kria planu di’ak, tanba bele loke formasaun iha munisípiu Vikeke hodi ita-nia joven sira asesu. Tan ne’e, ha’u agradese ba SEFOPE ne’ebé lori besik formasaun ba ita-nia joven sira iha Vikeke. Nune’e mós ha’u husu ba joven sira formasaun saida de’it mak iha tenke tuir hodi aprende no hasa’e abilidade ba kualkér servisu iha rai laran no rai li’ur”, nia hato’o.
Iha distribuisaun sertifikadu ba formandu kandidatu traballadór Austrália ne’e hetan partsipa husi diretór SEFOPE Vikeke, autoridade lokál, funsionáriu, formadór lian inglés husi SEFOPE no formandu sira husi postu lima iha munisípiu Vikeke.
Jornalista : Vitorino Lopes da Costa
Editór : Florencio Miranda Ximenes
