Autoridade Uatulari husu EDTL fó atensaun ba eletrisidade ne’ebé mate-lakan
VIKEKE, 25 Maiu 2025 (TATOLI)- Adiministradór Postu Uatulari, munisípiu Vikeke, Jorgé Ribeiro, kontinua husu Eletrisidade de Timor Leste, Empreza Públiku (EDTL,E.P) hodi fó atensaun ba eletrisidade ne’ebé iha postu Uatulari sempre mate no lakan.
“Eletrsidade iha Uatulari ne’e mate hela de’it. Se bele EDTL fó atensaun ba eletrisidade atu ita-nia komunidade sira nian sasán eletronika sira labele keima hotu. Tanba ne’e, ha’u hakarak hato’o ba EDTL hodi fó atensaun sériu ba eletrisidade ne’ebé durante ne’e mate beibeik ne’e”, Jorgé Ribeiro ba TATOLI, iha postu Uatulari, ohin.
Autoridade ne’e hatutan, durante ne’e eletrisidade postu Uatulari mate-lakan hela de’it nu’udar autoridade Uatulari sempre ko’alia beibeik ba tékkniku EDTL hodi hadi’a.
“Kona-ba eletrisidade mate lakan ne’e ha’u sempre fó hanoin beibeik ba sira EDTL. Hanesan horseik (kinta-21/05) mós ahi mate hahú tuku 19h00, kalan, to’o fali rai loron mak foin lakan fila fali ida-ne’e se mak sai vítima komunidade liuliu negosiante. Ahi mate beibeik ne’e ninia kauza ne’e mai husi ai-horis sira-ne’ebé besik ba liña eletrisidade tanba tempu udan no anin boot ne’e eletrisidade iha postu Uatulari ne’e sempre mate”, nia akresenta.
Hataan ba preokupasaun ne’e, Tékniku EDTL,E.P postu Uatulari, Feliciano Almeida, haktuir kona-ba eletrisidade ne’ebé mate lakan ne’e tanba kauza husi ai-horis mak monu ba fiu leten, maibé kuandu akontese tékniku sira sempre la’o tuir hodi limpeza, hafoin fornese fila ai-ahi eletrisidade.
“Eletrisidade ne’ebé mate lakan ne’e kauza husi ai-horis ne’ebé motu iha fiu leten. Maibé akontese ganguan ruma ami sempre la’o tuir hodi normaliza. Alende ida-ne’e ami moos halo limpeza ai-horis sira-ne’ebé besik iha liña sira. Ami-nia difikuldade ida mak laiha transporte hodi haforsa ami-nia servisu, difikuldade sira-ne’e ami sempre relata bei-beik ba am-nia boot sira, maibé to’o agora laiha resposta ruma”. nia hato’o.
Jornalista : Vitorino Lopes da Costa
Editór : Florencio Miranda Ximenes
