PAM Vikeke koordena PNTL rekolla motór Estadu iha eis funsionáriu PDNS
VIKEKE, 25 Maiu 2025 (TATOLI)- Prezidente Autoridade Munisípiu (PAM) Vikeke, Francisco C.S de G. Soare, hateten sei koordena ho Polísia Nasionál Timor Leste (PNTL) munisípiu Vikeke hodi rekolla motorizada ne’ebé eis-funsionáriu PNDS sira uza no seidauk entrega ba Estadu.
“Motorizada sira-ne’e ha’u husu bei-beik ona ba eis funsionáriu PNDS sira atu entrega ba patrimónia Estadu nian, antes ne’e ita koopera ho PNTL Vikeke Vila rekolla ona motorizada husi eis funsionáriu PNDS postu Vikeke-Vila nian. Maibé, postu Uatulari mak to’o agora seidauk entrega. Iha tempu badak laran ha’u sei koordena ho komadante PNTL hodi rekolla motorizada sira-ne’ebé eis PNDS sira seidauk entrega”, PAM Vikeke ne’e hateten ba jornalista sira, iha Vikeke, ohin.
Autoridade ne’e dehan, eis funsionáriu PNDS ne’e servisu ramata ona ne’ebé tenke entrega fali veíkulu estadu nian, laiha razaun ida hodi uza patrimóniu Estadu, tuir ema ida-idak ninia gostu.
“Sé ita remata ona ita-nia misaun (servisu iha PNDS), hakarak ka lakohi ita entrega fali sasan Estadu nian. Ha’u haruka ona karta dala-rua ba Komandate PNTL munisípiu Vikeke konsege foti motorizada balun, nune’e ha’u sei hasoru direta tan komadante PNTL para rekolla patrimóniu Estadu. Se karik osan mak seidauk selu ba eis funsionáriu PNDS, di’ak liu ba ko’alia iha Ministériu Administrasaun Estatal (MAE) hodi rezolve, la’ós utiliza fali motorizada Estadu”, nia hato’o.
Iha fatin ketak, Diretór Programa Dezenvolvimentu Nasionál Suku (PNDS) Munisípiu Vikeke, Francisco S. Verela, haktuir kona-ba motorizada ne’ebé iha eis-funsionáriu PNDS nian liman parte Vikeke Vila, PNTL eskuadra rekolla ona hela ida mak seidauk rekolla no iha postu Uatulari ho unidade lima mak seidauk rekolla.
“Sasán patrimóniu Estadu ne’e ami entrega ba parte PNTL hodi uza kompeténsia asegura motorizada sira-ne’ebé seidauk entrega. Kestaun saláriu ba eis funisionáriu sira-ne’e buat ketak. Tan ne’e, ha’u husu ba PNTL uza profisionál hodi rekolla sasán patrimóniu estadu ne’ebé iha eis funsionáriu sira nian liman”, nia akresenta.
Tuir dadús motorizada marka Yamaha c150 ne’ebé daudaun ne’e iha eis funsionáriu PNDS sira iha postu Uatulari hamutuk unidade lima (5) no postu Vikeke Vila motorizada unidade ida (1) seidauk entrega ba diresaun PNDS munisípiu Vikeke.
Jornalista : Vitorino Lopes da Costa
Editór : Francisco Miranda Ximenes
