VIKEKE, 26 Maiu 2025 (TATOLI)—Abitante husi postu Vikeke Vila husu autoridade munisípiu Vikeke organiza negosiante sira-ne’ebé faan produtu lokál labele okupa espasu públiku tanba difikulta ba ema la’o ain ba-mai.
Abitante husi suku Karaubalu, João Fernando Marçal Ximenes, hateten negosiante sira-ne’ebé faan sasán iha trotoar leten difikulta ba ema la’o ain sira, tanba dalan ne’ebé la’o ain nian la’ós fatin negosiante sira uza faan sasán entaun ema la’o fali iha estrada laran.
“Ita-nia negosiante sira okupa tiha trotoar, entaun prejudika ba ami la’o ain sira tanba karreta sira movimentu bele soke fali ami nomós difikulta transporte sira-nia movimentu. Ami husu ba autoridade munisípiu, se bele muda provizóriu negosiante sira-ne’e ba merkadu laran, atu husik trotoar sira-ne’e ba ema uza hodi la’o,” João Fernando Marçal Ximenes hateten ba jornalista sira, iha merkadu Vikeke Vila, ohin.
Nia afirma, negosiante sira-ne’ebé faan iha trotoar leten ne’e kuaze tinan naruk ona, maibé seidauk fó atensaun ba negosiante sira-ne’ebé okupa espasu públiku.
Tanba ne’e, abitante sira hakarak husu parte relevante sira tau atensaun ba negosiante sira., no mós kria fatin ba negosiante sira hodi labele faan sasán iha trotoar leten henesan agora daudaun ne’e.
Iha fatin hanesan, negosiante Felisidade de Souza Freita, haktuir negosiante sira deside faan iha trotoar leten tanba fatin merkadu tuan la sufisente ba negosiante sira faan sasán.
“Ami hakarak faan iha merkadu laran, maibé iha merkadu ne’ebá ne’e espasu kloot no fatin nakonu ho lixu, tan ne’e mak ami faan sasán iha Estrada. Uluk, SETOU mai fó hatene ami ba faan iha merkadu laran maibé fatin merkadu laran ne’e la sufisente. Se fatin ne’ebá hamoos ona, ami bele ba faan iha laran,” nia dehan.
Hatan ba preokuoasaun ne’e, Prezidente Autoridade Munisípiu (PAM) Vikeke, Francisco C.S de G. Soares, hatetn kona-ba merkadu agora daudaun foin halo reabilitasaun ba merkadu Olobai, bainhira reabilitasaun ramata sei muda negosiante sira-ne’e ba merkadu Olobai.
“Foin lalais mak ita halo kontratu ba empreza ida hodi halo reabilitasaun ba merkadu Olobai. Loos duni, ita akompaña ita-nia negosiante barak mak okupa iha estrada. Maibé, reabilitasaun ba merkadu Olobai mak remata ita sei muda negosiante sira ba fatin ne’ebé dignu hodi buka sira nian moris,” nia hateten.
Jornalista : Vitorino Lopes da Costa
Editór : Cancio Ximenes
