Abitante Vikeke preokupa-husu Governu hadi’a estrada iha suku Bahalara Uain
VIKEKE, 26 Maiu 2025 (TATOLI)—Abitante husi suku Bahalara Uain, postu Vikeke Vila, munisípiu Vikeke, preokupa kondisaun estrada ligasaun bá suku Bahalara Uain ne’ebé nia kondisaun aat no husu ministériu kompetente atu hadi’a Estrada ne’e, tanba difikulta movimentasaun transporte públiku no komunidade lori produtu lokál ba merkadu.
Reprezentante abitante suku Bahalara Uain, Mateus Pinto, hateten kondisaun estrada liga ba suku Bahalara Uain ne’e kondisaun atuál aat tebe-tebes, tanba sempre difikulta komunidade lori sira-nia produtu lokál bá merkadu.
“Ami-nia estrada ne’e diretór obra públika Vikeke baibaibn la’o ba-mai haree hela kondisaun estrada aat, difikulta ba ita-nia transporte sira-nia movimentu no komunidade hakarak lori sira-nia produtu bá merkadu mós difikulta hotu. Tan ne’e, ami husu parte relevante sira tau matan ba estrada sira-ne’e hodi hadi’a atu labele difikulta povu nia atividade”, Mateus Pinto, ba jornalista sira iha suku Bahalara Uain, ohin.
Nia dehan, komunidade prefere ba Ministériu relevante sira aselera konstrusaun ka normalizasaun Estrada rural ne’e ho kondisaun aat, nune’e bele fasilita komunidade asesu hodi lori produtu bá merkadu.
“Tanba, durante ne’e ami sente estrada mak sai obstaklu ida ba ita-nia komunidade nia movimentu ba-mai. Tan ne’e, Governu fó atensaun ona ba estrada sira-ne’e, atu la difikulta povu nia atividade nhodi lori produtu lokál ba faan iha merkadu,” nia hateten.
Hatán ba preokupasaun ne’e, diretór serviu Obra Públika munisípiu Vikeke, Casilvo Gomes Soares, hateten kona-ba estrada liga husi postu Vikeke Vila ba to’o suku Bahalara Uain sai preoukpasaun ba komunidade no autoridade lokál sira.
“Kondisaun estrada sira-ne’e sai preokupasaun tebe-tebes ba ita-nia komunidade maibé ita-nia ministrui mós sei fó atensaun ba estrada nasionál sira-ne’e iha tinan 2025-2026. Nune’e mós ita aprezenta estrada hamutuk pakote 21 ba MOP hodi fó atensaun ba estrada sira iha munisípiu Vikeke,” nia dehan.
Jornalista : Vitorino Lopes da Costa
Editór : Cancio Ximenes
