DILI, 26 Maiu 2025 (TATOLI) – Diresaun Nasionál Bombeiru ne’ebé tutelár ba iha Ministériu Interiór liuhusi Autoridade Protesaun Sivil (APC) selebra aniversáriu ba da-25. Nune’e, DNB husu Governu tau importánsia ba estatutu legál tratamentu bombeiru profisionál sira.
Diretór Diresaun Nasionál Bombeirus, Anibal Paulo de Oliveira Maia hateten, relasiona ho APC nia komemorasaun aniversáriu ba da-25 APC mós sempre hasoru dezafiu oioin tanba servisu iha risku nia laran, dalaruma mós akontese mate tanba ahi, aleinde ne’e sira mós enfrenta kona-ba estatutu legál ba tratamentu bombeiru nian.
“Governu tenke tau importánsia ba bombeirus ne’ebé mak profesionais nune’e sira bele ezerse dezempeña sira-nia funsaun iha territóriu tomak tanba sira sempre hasoru dezastre oioin iha inséndiu, inundasaun, ne’ebé fó risku da vida de morte (mate)”, diretór ne’e informa ba jornalista sira iha edifísiu APC, Kaikoli, Dili, ohin.
Entaun, Dirijente ne’e informa, APC presiza maka legalidade ba estatutu tanba bombeirus halo dezenpeñu operasionál bainhira nia hetan dezastre bele hetan tratamentu ne’ebé adekuadu ho lei ruma, tanba sira hetan asistente servisu no balu hetan moras inséndiu ne’ebé afeta husi ahi boot fó impaktu ba sira-nia pulmaun no barak mak lakon sira-nia moris.
Tanba tuir estatutu husi Bombeirus Timor-Leste daudaun ne’e integra hela iha kuadru legál Autoridade Protesaun Sivíl ne’ebé espesialmente regula husi Lei Protesaun Sivíl ho nú.º 12/2020, de 2 de dezembro no mós husi diploma orgániku resentes hanesan iha Dekretu-Lei nú.º 46/2023 nu’udar dokumentu komplementar.
“Nune’e ho dezafíu hirak-ne’e sai hanesan referénsia ba sira hodi tuur hamutuk oinsá hodi haree problema hirak-ne’e, tanba Timor-Leste mós ukun aan ona ba da-23. Ho nune’e APC presiza estatutu ida atu halo tratamentu ne’ebé di’ak ba bombeirus sira ho dignidade”, diretór nasionál ne’e hatutan.
Presiza aumenta rekursu
Daudaun ne’e ekipa bombeiru efetivu profisionál ne’ebé kobre iha territóriu tomak hamutuk na’in-418 ne’ebé destaka iha korpu hotu-hotu, maibé sira mós presiza aumentan tan rekursu foun nune’e bele aumenta servisu emerjénsia hodi kobre povu nia nesesidade iha nasaun ida-ne’e.
“Entaun liga ba ekipamentu operasionais ne’ebé ami iha sufisientemente atu halo atendementu ho lixeirus iha alta eskala maibé ami lakonsege tanba presiza aumenta tan ekipamentu ne’ebé moderniza”, nia hato’o.
“Ekipamentu viatura mós tenke aumenta nafatin ba iha kada korpu no tinan-tinan APC halo planu no Estadu mós bele konsidera hodi tau-matan planu ida-ne’e atu ekipa bombeirus bele kobre ba nesesidade emerjénsia no urjénsia sira-ne’e”, nia akresenta.
Entretantu, viaturas ne’ebé daudaun ne’e APC iha hodi utiliza ba situasaun emerjénsia hamutuk iha hitu, maibé sira mós nafatin husu ba Governu atu aumenta viatura sira-ne’e hodi destaka mós ba iha postu administrativu.
Jornalista: Alexandra da Costa
Editór: Rafael Ximenes de A. Belo
