Grovee: Governu tenke promove setór privadu dudu dezenvolvimentu la’o ba oin
DILI, 26 Maiu 2025 (TATOLI)—Antigu Embaixadór Estadu Unidu Amérika iha Timor-Leste Grovee J. Ress, hateten Governu Timor-Leste tenke fó prioridade no promove setór privadu sira atu dudu dezenvolvimentu rai-laran bele la’o ba oin.
“Tuir ha’u-nia hanoin, atu dezenvolvimentu di’a- liu, ita tenke estabelese setór privadu ida tanba setór privadu sei tau prioridade ba nia povu nia nesesidade. Iha nasaun barak, iha mundu ne’e iha setór privadu, iha Timor tenke apoiu maka’as setór privadu sira dezenvolve agrikultura, turizmu no seluk tan,” Grovee J. Ress hateten ba jornalista sira hafoin reuniaun ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite, segunda ne’e.
Nia dehan, setór privadu ho Governu iha papel ne’ebé importante atu hakonu nesesidade povu nian.
“Ha’u fiar katak Governu no Prezidente Timor-Leste hakarak instituisaun públiku hotu-hotu tenke fó atendementu ba povu, maibé susar tebes atu implementa,” nia dehan.
Tuir diplomata amerikanu ne’e hateten, Timor-Leste nia progresu dezenvolvimentu la’o di’ak uitoan kompara ho tinan sira liu ba kotuk.
“Ha’u la’ós peritu dezenvolvimentu nian maibé buat ne’ebé ha’u haree, tanba ha’u vizita beibeik, karik tinan ida dala ida, ha’u sempre haree. Iha karreta barak-liu duké uluk, iha edifísiu barak-liu duké uluk, bele di’ak liu uitoan. Ne’e depende ba karreta no edifísiu sira,” nia dehan.
Jornalista : Hortencio Sanchez
Editór : Cancio Ximenes
