DILI, 26 Maiu 2025 (TATOLI)—Inspetór-Jerál Jogu, Anibal Martins, esplika kona-ba eziténsia jogu online (online gaming) ne’ebé kaer husi empreza Arl Kaapstaad Unipessoal Lda no Togo Exzim Gaming S.A.
“Kona-ba lansamentu atividade jogu online iha loron 24 Maiu 2025 iha Beach Garden, Praia dos Coquieros, hanesan aktu repozisaun faktu relasiona ho afirmasaun balun ne’ebé maihusi Reprezentante empreza Togo Exzim Gaming S.A, Inácio Moreira, ne’ebé afirma katak hetan lisensa husi Inspesaun Jerál Jogu (IGJ)/Ministériu Turizmu no Ambiente (MTA) atu hala’o jogu online iha Timor-Leste,” Anibal Carvalho Martins, hateten iha ninia knaar fatin, Bebora, Segunda ne’e.
Inspetór-Jerál dehan, razaun hato’o informasaun ne’e atu labele lori sosiedade tomak konsume notísia ne’ebé la korresponde ba lia loos.
Nia esplika kronolojia, empreza Arl Kaapstaad Unipessoal Lda hetan kontratu husi Ministériu Turizmu Komérsiu no Indústria (MTKI) ho numeru 24/GMTCI/II/2019, ne’ebé asina iha loron 25 Fevereiru, atu sai nu’udar konsesionária ba jogu online.
“Empreza Arl Kaapstaad Unipessoal Lda, bainhira asina tiha kontratu, hahú hala’o atividade iha modalidade online ho produtividade ne’ebé konsidera la negativu maibé presiza hetan motivasaun, liuhusi estratéjika remodelasaun ba empreza no foku iha área marketing. Jogu online nu’udar produtu foun ba Timor-Leste iha 2019 tempu ne’ebá, hetan difikuldade atu halibur kliente ka konsolida iha Timor-Leste tanba objetivu lisensa ne’ebé fó, no karater atividade jogu online ne’e rasik, ne’ebé tenke foku ba merkadu internasionál, nune’e mós labele aperta demais merkadu nasionál ne’ebé konsesionária jogu balun hala’o hela atividade,” nia akresenta.
Notísia relevante : Janeiru-Fevereiru, IGJ arrekada reseita liu rihun $600 ba kofre Estadu
Ho difikuldade ne’ebé iha, konsesionária Arl Kaapstaad Unipessoal Lda hahú buka parseria internasionál ne’ebé maka iha esperiénsia iha modalidade jogu online atubele fó prestasaun serbisu liuhusi introdús sistema jestaun ne’ebé efikáz hodi bele hasa’e rendimentu.
Nune’e, IGJ iha koñesimentu katak konsesionária Arl Kaapstaad Unipessoal Lda
uluk halo tiha ona kooperasaun ho empreza balun atu hadi’a jestaun liuhusi kontratu internu entre konsesionária Arl Kaapstaad Unipessoal Lda no empreza ne’ebé atu hala’o jestaun.
“Haree ba rezultadu ne’ebé la satisfatóriu, Arl Kaapstaad Unipessoal Lda iha tinan-rua liubá hahú halo kontaktu ho empreza iha Filipina naran Togo Exzim Gaming S.A halo akordu atu troka fali empreza ida-ne’ebé halo uluk ona, tanba la susesu, nune’e konsesionária halo akordu ho Togo Exzim Gaming S.A, atu ezerse funsaun nu’udar empreza ne’ebé fornese prestasaun serbisu tékniku ba konsesionária jogu online Empresa Arl Kaapstaad Unipessoal Lda ne’ebé iha kontratu ho Estadu liuhusi MTKI,” Inspetór-Jerál, relata.
Inspetór-Jerál subliña, afirmasaun empreza Togo Exzim Gaming SA, liuhusi nia Reprezentante, Inácio Moereira katak sira hetan lisensa husi IGJ ne’e kompletamente falsu (laloos), tanba tuir lei, empreza ne’ebé konsidera parseiru Estadu nia bainhira atu hala’o atividade jogu tenke kumpre rekezitu lubuk ida hanesan tékniku, administrativu no finanseiru, hafoin hetan aprovasaun husi Ministru tutela maka bele hala’o atividade.
“Maibé iha kazu ida-ne’e empreza Togo Exzim Gaming SA la hetan previlejiu ida-ne’e. Vinkulasaun jurídika ka legál ne’ebé iha relasiona ho atividade jogu online maka ho de’it empresa Arl Kaapstaad Unipessoal Lda liuhusi kontratu ne’ebé halo ona ho MTKI iha tinan 2019,” nia katak.
Nune’e, empreza Togo Exzim Gamimg SA tenke submete ba de’it konsesionária legál maka empreza ARL Kaapstaad Unipessoal Lda
ne’ebé hetan lisensa husi Estadu liuhusi selebrasaun kontratu.
“Responsabilidade ruma ne’ebé maka tenke asume perante Estadu liuhusi MTA maka sei presta husi Arl Kaapstaad Unipessoal Lda, la’os empreza Togo Exzim Gaming SA,” Anibal Martins tenik.
Aleinde ne’e, lansamentu era foun ba empreza Arl Kaapstaad Unipessoal Lda hamosu dúvida balun ne’ebé sai husi diskursu Reprezentante empreza Togo Exzim Gaming SA, Inácio Moreira, relasiona ho modalidade jogu hanesan lotaria, totobola, no futu-manu, ne’ebé tuir lei iha nia regra rasik atu hetan lisensa husi IGJ/MTA, hafoin bele halo atividade liuhusi online.
Tanba iha rekezitu ne’ebé lei ezije atu kumpre, IGJ nu’udar orgaun reguladór bazeia ba DG, númeru10/2008 11 Juñu, afirma katak empreza Togo Exzim Gaming SA lahetan lisensa atu hala’o atividade jogu iha Timor-Leste, apenas halo prestasaun serbisu ba konsesionária legál empresa Arl Kaapstaad Unipessoal Lda, ne’ebé konsidera legál atu hala’o atividade jogu online, liuhusi kontratu ne’ebé selebra ho ministériu tutela.
“Kualker produtu foun atu implementa husi konsesionária legál sira iha modalidade jogu ne’ebé sira hala’o, tenke aprezenta mai IGJ atu halo avaliasaun no aprovasaun, ka bele mós la hetan arpovasaun,” inspetór Jerál fó hanoin.
Kona-ba selu taxa, ba oin empreza sira selu taxa 10% ba Estadu husi sira-nia rendimentu kada-fulan.
Kritériu atu rejistu ba jogu online mak empreza ruma ne’ebé mak iha interese atu hala’o iha jogu tantu online no sira seluk, dahuluk tenke aprezenta sira-nia proposta iha ne’ebá kritériu kapitál investimentu, planu investimentu ba ministériu, hafoin haree hatun despaisu mai IGJ hodi verifika no priense rekezitu mak bele hetan lisensa.
Rekezitu ida atu investe iha jogu online tantu mákina tenke iha kapitál depízitu iha banku millaun $10.
Daudaun jogu barak ona iha Timor-Leste tantu online no mákina atu kontrola másimu IGJ mós agora hahú ona alterasaun ba lei, ne’ebé mai ne’e sei rigoroju kontrola jogu sira.
Nia dehan, provizóriu lisensa ne’ebé IGJ fó ba empreza sira la fó tinan naruk maibé fó provatóriu tinan-ida de’it hodi hein lei foun ne’ebé altera iha.
“Lei foun mai ne’e sei regula jogu sira hahú tenke harii nia server kontrola iha Timor, nune’e reseita ne’e ba Estudu, presiza kontrolu tanba jogu online ne’e,” nia hato’o.
To’o notísia ne’e tuun, Ajénsia TATOLI seidauk hetan konfirmasaun husi empreza.
Jornalista : Arminda Fonseca
Editora : Julia Chatarina
