DILI, 26 Maiu 2025 (TATOLI) – Organizasaun naun-lukrutivu Haburas Dezenvolve Talentu (HADEZTA) fasilita formasaun ba estudante na’in-55 husi ensinu sekundáriu jerál ho tema “Hasa’e juventude sira-nia kapasidade liuhusi formasaun ba abilidade esensiál sira, edukasaun sívika no rezolusaun konflitu la ho violénsia hodi kontribui ba pás no promove koezaun sosiál”.
Objetivu husi atividade ne’e hodi hakbiit juventude sira liuhusi formasaun programa edukasionál bazeia ba nesesidade estudante sira-nian, liuliu sira-ne’ebé mak iha esperiénsia envolve iha konflitu no problema ho lei.
Diretór HADEZTA, Francisco de Araújo hateten, ida-ne’e hanesan matéria ba atividade kurrikular ida- ne’ebé antes ne’e sira prepara durante fulan tolu no hetan ona aprovasaun husi Ministériu Edukasaun (ME) hodi implementa formasaun nune’e ohin loron sira hahú realiza ona formasaun ne’e.
“Implementasaun ne’e maka ita identifika ona eskola tolu ne’ebé mak sempre mosu konflitu hanesan, Ensinu sekundáriu jerál 4 de Setembru, Finantil no eskola 10 de Dezembru. Entaun, husi formasaun ne’e oinsá atu hasa’e koñesimentu joven sira-nian liuliu ba iha rezolusaun konflitu”, diretór ne’e informa ba jornalista sira iha salaun ESG 4 de Setembru Balide, Dili, ohin.
“Tanba ita hotu hatene katak eskola tolu ne’e sempre mosu konflitu entre estudante ho estudante, entaun buat sira-ne’e mak ita hakarak fahe matéria ba sira”, nia akresenta.
Aleinde ne’e sira mós sei kontinua implementa ba iha eskola sira seluk liuliu munisípiu sira, tanba implementasaun projetu ne’e hetan apoiu husi Programa Nasaun Unida ba Dezenvolvimentu (PNUD) ho montante USD$50 mil maske durasaun tempu fulan ualu ualu maibé UNDP hakarak kontinua programa ne’e.
“Ha’u hanoin atividade ne’e importante tebtebes ba ita-nia estudante sira tanba ita-nia maluk timoroan mós iha hanoin ona preokupasaun saida mak akontese iha rai-laran nune’e ezisténsia husi organizasaun ne’e hodi fó hanoin, kontribui ba edukasaun no kualker parte ne’ebé importante tebes ba estudante sira,” Diretór Nasionál Ensinu Sekundáriu Jerál ME, Fernando Mouzinho Gama.
Iha oportunidade ne’e, Diretór Ensinu Sekundáriu Jerál 04 Setembru, Sergio Alfredo da Cruz sente orgullu tebes ho kooperasaun ne’ebé mak iha entre organizasaun HADEZTA hodi fó formasaun ba juventude sira atu hadook sira-nia aan husi violénsia no konflitu.
“Tanba iha era ida agora ne’e kuaze ita-nia jerasaun foun juventude barak mak seidauk iha konsiénsia oinsá atu kria moris ida harmoniz iha sira-nia moris loro-lorin nian. Entaun liuhusi formasaun ida ohin ne’e importante tebes hodi tulun no loke estudante sira-nia hanoin atu labele halo konfrontu ba malu,” diretór eskola ne’e konsidera.
“Iha semana foindauk ne’e akontese konflitu entre estudante sira maske kiikoan maibé ita presiza minizia sira-nia hanoin, nune’e perspetiva husi HADEZTA nia ne’e di’ak tebes hodi tulun estudante muda sira-nia hanoin”, nia informa.
Tanba iha Ensinu sekundáriu jerál 04 de Setembru ne’e, númeru estudante boot tebes 2.389. Dalaruma konflitu sempre mosu entre sira ho sira. “Nune’e ohin loron sira selesiona estudante husi kada turma na’in-55 hodi partisipa iha formasaun ne’e. Ida-ne’e hanesan atividade estra kurrikular no durante formasaun ne’e la’o estudante sira presiza iha responsabilidade hodi tuir ho di’ak”, nia hateten
Enkuantu, Reprezentante PNUD, Nelson Philomeno agradese ba HADEZTA tanba iha inisiativa hodi promove juventude sira husi formasaun vokasionál.
“Tanba HADEZTA nia knaar ne’e atu tulun juventude sira bainhira ramata ona eskola sira bele kontribui buat di’ak ruma ba sira-nia aan no nasaun,” reprezentante ne’e dehan.
Tanba ne’e nia husu estudante sira atu aproveita didi’ak formasaun ida-ne’e hodi kontribui ideia no sai referénsia ba PNUD no HADEZTA atu hadi’a.
Atividade ida-ne’e sei realiza durante loron lima hahú ohin to’o loron 30 fulan-Maiu 2025 no totál estudante ne’ebé partisipa iha formasaun ne’e hamutuk na’in-55.
Jornalista: Alexandra da Costa
Editór: Rafael Ximenes de A. Belo
