DILI, 27 Maiu 2025 (TATOLI)—Autoridade Nasionál Komunikasaun (ANC, sigla portugés) arrekada reseita $554.590,16 ba konfre Estadu iha Janeiru to’o Maiu 2025.
“Ba projesaun reseita tinan ne’e hamutuk $2.054.290, maibé ramata tinan ne’e bele liu númeru projesaun ne’ebé iha, tanba Internet Service Provider (ISP) auemnta, ezemplu iha tinan kotuk projesaun ita tau millaun $2 resin maibé ikus mai rekolla liu tiha millaun $3 liu,” Prezidente ANC, Flávio Cardoso Neves, informa iha salaun ANC, Kaikoli, Tersa ne’e.
Nia esplika, daudaun númeru reseita akumuladu kiik tanba kada operadór telekomunikasaun no ISP sira selu sempre iha fulan ikus.
Notísia relvante : ANC arrekada reseita millaun $3,1 durante tinan 2024
Reseita sira ne’e maihusi operadór telekomunikasaun tolu hanesan Timor Telecom, Telemor no Telkomcel, inklui empreza ISP sira hanesan Gardamor ISP, Lda, Metrolink, Lda, Raph Vision Electronic Unip, Lda, SacomTel, Lda, Marapido Net Unipessoal Lda, Apurva Unipessoal, Lda, Megtelco, Lda, no Kacific Broadband Satellite Unipessoal, Lda.
Kada operadór no empreza selu taxa 2% husi sira-nia rendimentu ba ANC.
“Reseita hirak ne’e bele kontribui mós ba reseita doméstika. Tuir ha’u-nia haree ita atu hetan reseita barak liu ne’e bainhira operadór aumenta barak reseita ba Estadu mós aumenta,” nia akresenta.
Iha tinan 2024 ANC rekolla reseita hamutuk millaun $3,1 ba kofre Estadu, no iha tinan 2023 rekolla reseita hamutuk $2.678.967,84.
Autoridade ne’e nu’udar institutu públiku ho personalidade jurídika, ne’ebé iha autonomia administrativa no finanseira, iha orsamentu no patrimóniu própriu, ho objetivu atu ezerse funsaun hanesan entidade reguladora setór telekomunikasaun.
Jornalista : Arminda Fonseca
Editora : Julia Chatarina
