KOVALIMA, 27 Maiu 2025 (TATOLI) – Diretora Servisu Munisipál Apoiu Organizasaun Naun-Governamentál no Organizasaun Komunitária (SMAOGOK), Maria de Jesus Perreira, fó hanoin ba lideransa komunitária ida-idak, atu kontrola motorizada husi pesoál sekretáriu suku, iha munisípiu Kovalima.
“Bazeia ba informasaun ne’ebé ha’u simu husi servisu munisipál lojístika bainhira hala’o monitorizasaun, identifika motorizada ne’ebé mak sekretáriu simu tau de’it iha uma, bainhira presiza mak foti iha uma”, Dirijente SMAOGOK Maria de Jesus Perreira, dehan, iha salaun AMC bainhira partisipa iha enkontru kona-ba konsolidasaun servisu, ohin.
Dirijente ONG husu atu xefe suku sira kontrola motorizada sira ne’ebé mak entrega ona ba sekretáriu suku tanba motorizada ne’e uza atu hala’o servisu iha suku no bainhira uza karik tenke hetan orientasaun husi xefe suku, la’ós uza ba privadu.
Aleinde ne’e bainhira uza motorizada ho marka Revo tenke hetan orientasaun husi xefe suku sira, uza motorizada sai karik atu hala’o servisu saida, foti dadus ruma iha aldeia ka oinsá tanba motorizada ne’ebé Governu distribui la’ós atu uza ba privadu.
Tuir Ministériu Administrasaun Estatál (MAE) distribui motorizada ba xefe suku no sekretáriu suku sira iha munisípiu Kovalima hamutuk unidade 60 kompostu husi marka verza 29, Mio Beat ida ba xefe suku Maudemo no Honda Revo 30 ba sekretáriu sira.
Lembra katak, empreza ne’ebé mak manan konkursu públiku husi MAE mak Bandido Qualidade hodi halo akizisaun ba motorizada 904 hodi distribui ba suku sira iha territóriu nune’e bele hala’o servisu ho di’ak liu.
Motorizada ne’ebé sosa ho tipu tolu mak hanesan marka Vera ba xefe suku sira hamutuk 447, Mio Beat lima ba xefe suku feto no Honda Revo hamutuk 452 ba sekretáriu suku sira.
Jornalista:Celestina Teles
Editór: Rafael Ximenes de A. Belo
