DILI, 27 Maiu 2025 (TATOLI)–Prezidente Tribunál Rekursu, Afonso Carmona, hateten agora daudaun inspetór husi Tribunál Rekursu inspesiona hela servisu juíz sira molok promove bá juíz primeira klase.
Nia dehan, promosaun juíz husi terseira klase ba segunda klase inklui husi segundu klase ba primeira klase ne’e importante atu responde ba servisu Tribunál Rekursu no ba Supremu Tribunál Justisa ne’ebé sei estabelese iha tempu badak.
“Agora daudaun ita mós identifika juíz sira-ne’ebé prenxe kritériu ka regra sira atu halo promosaun,” Carmona hateten ba jornalista sira iha Ministériu Negósiu Estrajeiru no Kooperasaun (MNEK), Praia dos Coqueiros, Dili, tersa ne’e.
Carmona haktuir promosaun ba juíz sira-ne’e sei akontese iha fulan-Juñu tinan ida-ne’e.
“Inspesaun ba servisu juíz sira sei ramata iha fulan-Maiu ne’e no Juñu ita tama ona bá promosaun,” nia afirma.
Prezidente Tribunál Rekursu ne’e fundamenta katak tinan ne’e sei halo promosaun ba juíz na’in-sia (9) ba primeira klase hodi bá túr iha Tribunál Rekursu.
Jornalista: Natalino Costa
Editór: Xisto Freitas da Piedade
