DILI, 27 Maiu 2025 (TATOLI)–Ministru Justisa, Sergio Hornai, hateten nia sei konvoka enkontru ho Prezidente Trubunál Rekursu (PTR), Prokuradór Jerál Repúblika (PJR) inklui Defensór Públiku Jerál hodi aborda kle’an ba preparasaun instalasaun Supremu Tribunál Justisa.
Governante ne’e haktuir katak Xefe Estadu politikamente deklara ona katak molok nia mandatu terminadu tenke instala ona Supremu Tribunál Justisa, tanba ne’e, Ministru Justisa nu’udár entidade ne’ebé reponsável ba setór justisa sei buka koordenasaun nune’e bele instala obra referida.
“Lei Organizasaun Judisiária ne’ebé foin daudaun halo primeira alterasaun ne’e fó biban ba Prezidente Tribunál Rekursu ka Prezidente Supremu Tribunál Justisa atu haree kona-ba ida-ne’e,” Sergio Hornai hateten ba jornalista sira iha Praia dos Coqueiros, Dili, tersa ne’e.
Notísia relevante: Horta husu PTR aselera estabelesimentu Supremu Tribunál Justisa
Governante ne’e dehan, instalasaun Supremu Tribunál Justisa ne’e importante nune’e bele fó esperansa di’ak ba Timor-Leste ka lori justisa ne’ebé di’ak ba povu.
Sergio hateten, kona-ba rekursu ba Supremu Tribunál Justisa ne’e Timor-Leste iha juíz terseira klase, segunda klase, primeira klase no Lei Organizasaun Judisiária ne’e fó biban ba Prezidente Tribunál Rekursu halo promosaun ba juíz sira.
Jornalista: Natalino Costa
Editór: Xisto Freitas da Piedade
