DILI, 27 Maiu 2025 (TATOLI)–Diretór Investigasaun Kriminál Nasionál (DIK) Nasionál, Superintendente Polísia João Belo dos Reis, hateten Komandu Polísia Nasionál Timor-Leste (PNTL) halo ona identifikasaun ba sidadaun na’in-12 ne’ebé alegadamente envolve iha kazu konfrontu iha Postu Administrativu Kailaku, Munisípiu Bobonaru, iha 20 Maiu liubá, ne’ebé rezulta sidadaun ida ho naran Ronaldinho halakon nia vida.
“Suspeitu hamutuk-12 mak ita identifika. Husi na’in-12 ne’e, iha investigasaun kle’an mak ita foin hatene katak balun bele hanesan suspeitu, balun bele mós hanesan vítima no testemuña,” João Belo hateten ba jornalista sira hafoin partisipa serimónia aniversária Unidade Polísia Marítima (UPM) ba dala XXIII iha Kuartél UPM, Seonál, Lesidere, Dili, tersa ne’e.
Nia dehan, agora daudaun PNTL foin halo identifikasaun de’it, seidauk halo investigasaun kle’an ba envolvidu sira.
“Sira-ne’e ita foin halo identifikasaun ba sira. Ita haruka ona sira-nia auto-notísia ba Ministériu Públiku. Husi identifikasaun ita halo ba sidadaun sira-ne’e ita submete ona ba Ministériu Públiku ho NUC-0149-PNSIK kona-ba perturba orden públika no NUC-0150 PNSIK kona-ba kazu hamate joven ida ho naran Ronaldinho Mota Ximenes (23),” nia informa.
Belo hateten rezultadu invgestigasaun iha lokál krime submete ona ba Ministériu Públiku hodi halo prosesu tuirmai.
Notísia relevante: Forénsiku HNGV finaliza ona autópsia ba matebian Ronaldinho
Nia dehan, agora daudaun ekipa investigadór husi DIK retira ona iha terrenu tanba prosesu ne’e enkamiña ona ba Ministériu Públiku hodi kontinua prosesu kontinuasaun.
Nia rekorda katak akontesimentu ne’e aleinde hamate sidadaun referida, uma balun hetan estragu inklui motór no karreta balun mós hetan estragu.
Belo hateten, kona-ba rezultadu autopsia nian polísia labele públika tanba liga ho segredu justisa.
Komandante DIK ne’e mós relata katak situasaun seguransa iha Postu Administrativu Kailaku oras ne’e daudaun la’o kontroladu, tanba hetan orientasaun husi Komandu Jerál PNTL hodi destaka membru Unidade Espesiál Polísia (UEP) sira hodi asegura situasaun iha fatin referida.
Jornalista: Natalino Costa
Editór: Xisto Freitas da Piedade
