DILI, 23 Maiu 2025 (TATOLI)—Sekretáriu Estadu Formasaun Profisionál no Empregu, Rogério de Araújo Mendonça, informa tinan ne’e Governu Austrália ba Departamentu Negósiu Estranjeiru no Komérsiu (DFAT) sei harii Sentru Formasaun Akreditada ida iha Tasi Tolu.
“Ohin ami halo konsultasaun ka enkontru hodi delega ekipa ida sei halo inspesaun fatin iha Tasi Tolu. Ita hein katak konstrusaun edifísiu ne’e sei hahú iha tinan ne’e,” Rogerio dehan ba jornalista sira iha Timor Plaza, sesta ne’e.
Governante ne’e hatutan, objetivu husi konstrusaun ne’e atu garante kualidade rekursu umanu ne’ebé kualifikadu nune’e joven sira bele servisu iha Austrália ho padraun ne’ebé kualifikadu tuir nesesidade nasaun ne’ebá nian.
“Konstrusaun ne’e intersante, tanba Governu Austrália iha kompromisu boot atu harii sentru formasaun eselente ida ba Programa Mobilidade Laborál Austrália nian (ALMP) iha Tasi Tolu,” nia afirma.
Antes ne’e, Diretór Jerál Sekretaria Estadu Formasaun Profisionál no Empregu (SEFOPE), Carlito do Rosário Cabral, hateten Governu Austrália sei fó apoiu SEFOPE atu harii Sentru Formasaun Akreditada iha Tasi Tolu.
Objetivu hosi apoiu ba konstrusaun sentru referidu atu forma joven timoroan sira iha abilidade lian nian, hodi hatán ba merkadu traballu iha estranjeiru.
Nia hateten, Austrália sei apoia orsamentu dolar australianu millaun 4 iha tinan ne’e ba konstrusaun.
Jornalista: Felicidade Ximenes
Editór: Xisto Freitas da Piedade
