DILI, 27 Maiu 2025 (TATOLI)—Prezidente Repúblika, José Ramos Horta, hateten Timor-Leste sei hetan benefísiu barak bainhira adere ba Asosiasaun Nasaun Sudeste Aziátiku (ASEAN) iha fulan-Outubru sei hala’o simeira ba da-47 iha Kuala Lumpur, Malázia.
Notísia Relevante: PM Xanana sei halo aprezentasaun iha plenária simeira ASEAN ba dala-46
“Benefisiu boot hafoin Timor-Leste adere ba ASEAN mak, primeiru, relasaun diplomátika no polítika tanba Timor-Leste halo parte iha organizasaun rejionál ida. Iha organizasaun ne’ebá ASEAN importante tebes, iha ne’ebé kuaze ema millaun 60 mak iha organizasaun ne’ebá, kuaze ekonomia ASEAN nian hotu-hotu avansadu,” Horta hateten ba jornalista sira iha Palásiu Prezidensiál Nicolau Lobato, Bairru Pite, tersa ne’e.
Xefe Estadu hatutan tan katak, ekonomia nu’udár siénsia no kultura no iha tinan ida to’o tinan rua oin mai, sei iha vizitante husi nasaun oioin mai vizita Timor-Leste.
“Tinan rua oin mai, tinan-tinan Timor-Leste sei simu tan turista rihun 80 to’o 100, no kuaze Otel sira nakonu hotu no ami la halo kampaña boot ruma iha li’ur,” Horta tenik.
Prezidente mós rekomenda ba Governu, bainhira Timor-Leste adere ba ASEAN, Governu tenke tenta atrai investór sira mai investe iha rai-laran no fasilita investór sira trata dokumentu ho di’ak.
“Ha’u fiar katak iha tinan rua oin mai, Governu ida-ne’e sei aselera ekonomia, fasilita investimentu, hamenus no halakon burokrasia oioin, taka instituisaun sira-ne’ebé la fó benefísiu hanesan SERVE no seluk tan,” nia dehan.
Entretantu, anúnsiu iha Simeira ASEAN ba da-46, Primeiru-Ministru Malázia, Anwar Ibrahim, hato’o ninia apresiasaun ba parte hotu-hotu, tantu husi ASEAN nia laran no parseiru esternu sira, ne’ebé konsistentemente fó apoiu ba prosesu adezaun Timor-Leste nian.
Notísia Relevante: Timor-Leste tenke servisu makaas atu sai membru plenu ASEAN
Jornalista : Hortencio Sanchez
Editór : Cancio Ximenes
