DILI, 27 Maiu 2025 (TATOLI) – Ministru Interiór, Francisco da Costa Guterres hateten, Unidade Polísia Marítima (UPM) tenke kontinua prevene fronteira marítima husi tranzasaun ilegál.
“Ita-nia fronteira marítima ne’e luan liu fronteira terrestre, oinsá mak ita-nia UPM bele prevene atividade ilegál sira-ne’ebé mosu iha fronteira marítima hodi halo revista ba ema sira-ne’ebé halo tranzasaun ba sasán ilegál ne’ebé mobiliza liuhusi tasi nian. Ne’e ita boot sira-nia papél ida mak ne’e” Ministru ne’e hateten ba jornalista sira iha ámbitu selebra loron aniversáriu ba da-XXII.
Governante ne’e rekoñese katak UPM importante tebes ba Estadu Timor-Leste no sei serbisu hamutuk ho Komponente Navál no instituisaun sira seluk hanesan Karantina, Imigrasaun no Alfándega hodi tau-matan ba iha fronteira.
“Nune’e Governu iha ninia dever hodi bele investe iha unidade ida-ne’e atu oinsá bele kapasita no prepara ita-boot sira (UPM) para responde ba kualkér ameasa ne’ebé maka kada tinan sempre mai ho ninia forma diferente no forma ne’ebé sofistifikadu liu”, nia afirma.
Autoridade timoroan ne’e konsidera, dalabarak ameasa sira-ne’e mai liu tiha kbiit ema nian atu responde tanba ne’e Governu prepara kondisaun sira atu investe nune’e unidade ne’e iha kapasidade atu responde ba kualker ameasa sira-ne’ebé mak mosu iha fronteira marítima.
“Husi problema ne’ebé UPM apela ba Governu ne’e kestaun ne’ebé importante no sei tau atensaun hodi haree no tenke hahú investe iha tinan-2026 ba ita-boot sira tanba unidade ne’e Estadu tau hela esperansa atu bele prevene krime ne’ebé mosu iha tasi nian”, nia garante.
Ministru Interiór, Francisco da Costa Guterres mós apresia UPM nia servisu tanba durante ne’e sira responde ba situasaun difísil balun inklui situasaun krime ne’ebé mosu iha tasi.
Polísia Nasionál Timor-Leste nu’udar forsa seguransa iha nasaun RDTL ne’ebé konsagra ona iha K-RDTL artigu nú. 147.o katak Polísia sei imprende legalidade demokrátiku no garantia sidadaun sira-nia seguransa interna maibé sira labele iha apartidária polítiku tanba ne’e seguransa nasionál sai hanesan razaun fundamentu ba ezisténsia PNTL.
“Selebrasaun aniversáriu UPM nia hanesan onra no prestíjiu hodi hala’o servisu di’ak liután ba futuru nune’e ami agradese mós ba partisipasaun husi Ministru Interiór tanba iha ona tempu hodi bele partisipa iha seremónia ida-ne’e”, Segundu Komandante Jerál PNTL, Komisáriu Polísia, Pedro Belo hato’o.
Nune’e atribuisaun poder no dever PNTL atu asegura defamasaun sidadaun sira-nian no halo prevensaun ba krime no manutensaun ba orden públika hodi garante lideransa, monitorizasaun, fiskalizasaun fronteira terrestre no marítima hodi kontrola ema ne’ebé halo movimentu no sasan.
“Aumenta idade ida-ne’e, PNTL prontu atu apoiu nafatin ekipamentu ba UPM atu kontinua mantein kapasidade hodi asegura problema sira iha tasi-laran hodi luta ba nasaun ne’ebé segura maske hetan ameasa husi risku ne’ebé iha”, komisáriu ne’e garante.
Papél Unidade Polísia Marítima
- Timor-Leste nu’udar Estadu marítima soberanu iha ninia responsabilidade hodi preste seguransa iha tasi-laran no kontinua aproxima iha parte integradu sira iha sistema autoridade marítima nian ne’ebé estabelese ona espesifikamente atu fó patrollamentu vizilánsia no monotorizasaun ba iha área tasi-ibun no tasi sira Estadu nian atu prevene kombate aktu hanesan tráfiku umanu, terrorizmu, kontra bandu peskas no seluk tan.
- Aleinde ne’e atu fó seguransa iha área tasi-ibun monitoriza proteze ambiente marítima no riku-so’in tasi-okos liuhusi koordenasaun mós ho komponente Navál F-FDTL.
PNTL ho ninia funsionamentu instituisaun irarkiamente eziste unidade espesialidade mak hanesan Unidade Polísia Marítima ne’ebé tuir lei orgánika PNTL ho dekretu lei nú. 34/2024 ho misaun espesífiku hanesan” Asegura lideransa patrullamentu no intervensaun fiskalizasaun ba zona kosteira hotu-hotu tenke halo prevensaun no kriminalizadu.
Entretantu, iha seremónia aniversáriu UPM ba dala-XXII hetan partisipasaun husi entidante governamentál, naun-governamentál, entidade seguransa hanesan F-FDTL, PNTL no mós reprezentante entidande seguransa husi nasaun seluk.
Jornalista: Alexandra da Costa
Editór: Rafael Ximenes de A. Belo
